41 nafar o‘zbekistonlik Turkmaniston orqali Erondan qaytarildi
O‘zbekistonning Ashxobod va Tehrondagi diplomatik vakolatxonalari Turkmanistonning tegishli idoralari fuqarolarning qaytarilish masalasini hal qilgan.
O‘zbekiston Tashqi ishlar vazirligi ko‘magida bir guruh vatandoshlar Erondan Turkmaniston hududi orqali tranzit tarzda O‘zbekistonga qaytarildi, deya xabar bermoqda “Dunyo” AA.
Ma’lum qilinishicha, O‘zbekistonning Ashxobod va Tehrondagi diplomatik vakolatxonalari Turkmanistonning tegishli idoralari bilan hamkorlikda fuqarolarning qaytishi bilan bog‘liq viza va transport-logistika masalalarini hal qilgan.
Turkmaniston tomonining ko‘magi bilan jami 41 nafar O‘zbekiston fuqarosi “Saraxs–Seraxs” hamda “Gaudan–Bajgiran” chegara o‘tkazish punktlarida kutib olinib, diplomatik xodimlar nazorati ostida ularning xavfsiz tarzda O‘zbekistonga yetib kelishi ta’minlangan.
Diplomatik vakolatxonalar tomonidan bildirilishicha, hech bir fuqaro e’tibordan chetda qolmaydi. O‘zbekistonliklarni o‘z oilalari bag‘riga qaytarish ishlari inson manfaatlari ustuvorligi tamoyili asosida izchil davom ettiriladi.
