Janubiy Koreya sobiq birinchi xonimiga hukm o‘qigan sudya o‘lik holda topildi

Janubiy Koreya poytaxti Seulda mamlakat sobiq birinchi xonimining korrupsiya ishiga oid apellyatsiya sudiga raislik qilgan sudya Shin Chon O o‘lik holda topildi. Bu haqda Yonhap agentligi xabar berdi.

 

Ma’lum qilinishicha, sudyaning jasadi Seul Oliy sudi yaqinidagi gulzor hududidan tungi soatlarda aniqlangan. Uning yonidan qo‘lda yozilgan xayrlashuv maktubi topilgan bo‘lib, unda uzr so‘zlari keltirilgan, biroq ko‘rilgan ish haqida eslatma bo‘lmagan.

 

Dastlabki ma’lumotlarga ko‘ra, huquqni muhofaza qiluvchi organlar hodisada zo‘ravonlik alomatlarini aniqlamagan. Asosiy taxminlardan biri sifatida balandlikdan qulash versiyasi ko‘rib chiqilmoqda.

 

Sudya Shin Chon O Janubiy Koreyaning sobiq birinchi xonimi Kim Gon Xi ustidan ochilgan korrupsiya ishining apellyatsiya bosqichida raislik qilgan. Gon Xi aksiyalar narxini manipulyatsiya qilish hamda qimmatbaho sovg‘alar olishda ayblangan. 2026-yil yanvarida birinchi instansiya sudi Kim Gon Xini 1 yil-u 8 oyga ozodlikdan mahrum etgan, aprel oyida esa apellyatsiya sudida Chon O  jazoni 4 yilga uzaytirishga hukm chiqargan.

 

Sud tizimi vakillarining bildirishicha, sudya hukm e’lon qilinishidan oldin sud majlislarining jonli efirda namoyish etilishi sababli kuchli bosim va stressni boshdan kechirgan.

 

Kim Gon Xi 2025-yil avgust oyida hibsga olingan. U, jumladan, qiymati 2200 dollar bo‘lgan Dior sumkasini sovg‘a sifatida olganlikda ham ayblangan. Rasmiylar ushbu sovg‘a olinganini tasdiqlagan, biroq u davlat mulki sifatida rasmiylashtirilganini bildirgan.

 

Bundan tashqari, u Deutsch Motors kompaniyasining sobiq rahbari bilan til biriktirib, aksiyalar narxini sun’iy oshirish orqali noqonuniy daromad olishda ham gumon qilingan.

 

Sobiq prezident Yun Sok Yol esa 2024-yil dekabrida mamlakatda harbiy holat joriy etgani ortidan hibsga olingan. 2026-yil fevral oyida u qator ayblovlar, jumladan isyon uchun umrbod qamoq jazosiga hukm qilingan.