Navoiyda 13 nafar bog‘cha bolasini olib ketayotgan Matiz YTHga uchradi
Hodisa oqibatida bog‘cha rahbari bo‘lgan haydovchi ayol vafot etgan, bir bola koma holatida, 8 nafar bola shifoxonaga olib ketilgan.
Navoiy viloyatining Nurota tumanida bog‘cha bolalari bo‘lgan Matiz YTHga uchradi Bu haqda Kun.uz xabar berdi.
Ma’lum qilinishicha, YTH 5-may kuni ertalab sodir bo‘lgan. Tumandagi oilaviy bog‘chalardan birining rahbari bo‘lgan 34 yoshli ayol 13 nafar tarbiyalanuvchi va o‘zining 3 oylik chaqalog‘ini Matiz mashinasiga mindirib tashigan.
Ayol bolalarni yashash xonadonlaridan bog‘chaga olib ketayotgan bo‘lgan. U harakat paytida boshqaruvni yo‘qotgan va mashina yo‘ldan chiqib ketib, ag‘darilgan. YTH oqibatida ayol vafot etgan, bolalar esa turli darajada tan jarohatlari olgan. Ayni vaqtda bir bola koma holatida, 8 nafari esa viloyat markazidagi shifoxonaga olib ketilgani aytilmoqda.
Xabarga ko‘ra, er-xotin haydovchilik guvohnomasi bo‘lmagan holda yillar davomida mashina boshqarib kelgan. Bolalar doimiy ravishda shu holda uydan bog‘chaga va bog‘chadan uyga tashilgan. Hatto ota-onalar ham bunga e’tiroz bildirmagan.
Avval ham Navoiyda haydovchilik guvohnomasi ham, avtomobilni boshqarish huquqi ham bo‘lmagan shaxs mast holda 23 nafar bolani Damas’da tashigani aniqlangan.
