O‘zbekistonda ko‘mir, neft va gaz qazib olish kamaydi
Biroq benzin, elektr energiyasi, dizel yonilg‘isi va portlandsement ishlab chiqarishida o‘sish qayd etildi.
2026 yilning yanvar–mart oylarida O‘zbekistonda asosiy energiya resurslarini qazib olish hajmi kamaydi. Bu haqda Statqo‘m ma’lum qildi.
Ma’lumotlarga ko‘ra, I chorakda tabiiy gaz qazib chiqarish 9,6 mlrd kub metrni tashkil etib, o‘tgan yilning shu davriga nisbatan 15 foizga kamaygan.
Neft qazib olish hajmi 157,3 ming tonnani tashkil etib, 2025 yilning birinchi choragiga nisbatan 2,2 foizga pasaygan. Gaz kondensati ishlab chiqarish esa 18,3 foizga qisqarib, 242,3 ming tonnaga tushgan.
2024-yil bilan solishtirganda, tabiiy gaz qazib olish 17,2 foizga, neft 12,2 foizga, gaz kondensati esa 26 foizga kamaygan.
Shu bilan birga, ayrim mahsulotlar ishlab chiqarishida o‘tgan yilgidan o‘sish kuzatildi. Jumladan, avtomobil benzini ishlab chiqarish 2,9 foizga oshib, 313,2 ming tonnaga yetgan. Biroq bu ko‘rsatkich 2024-yil darajasidan hali ham 13,1 foizga pastligicha qolmoqda.
Ko‘mir qazib olish hajmi 1,1 mln tonnagacha kamayib, o‘tgan yilgi 1,2 mln tonna ko‘rsatkichga nisbatan 8,3 foizga qisqargan. Shu bilan birga, mazkur ko‘rsatkich 2024-yilning shu davrida qayd etilgan 1 mln tonnadan yuqori bo‘lib qolmoqda.
Sanoatning ayrim yo‘nalishlarida esa ijobiy o‘sish qayd etildi. Xususan, portlandsement ishlab chiqarish 13,9 foizga oshib, 4,1 mln tonnaga yetgan. Dizel yonilg‘isi ishlab chiqarish esa 54,3 foizga ko‘payib, 280,9 ming tonnaga yetdi.
Elektr energiyasi ishlab chiqarish ham o‘sishni namoyon etib, 4,7 foizga oshib 22,93 mlrd kVt/soatni tashkil etgan.
