Toshkentdagi “Brodvey” hududi to‘liq yangilanadi

Toshkent “Brodvey”i to‘liq rekonstruksiya qilinadi. Bu haqda poytaxt hokimligi xabar berdi.

 

Ma’lum qilinishicha, Toshkentdagi “Brodvey” — Sayilgoh ko‘chasi va unga tutash xiyobonlar, yashil hududlar, piyodalar yo‘laklari hamda shahar infratuzilmasi elementlarini o‘z ichiga olgan hududni kompleks rivojlantiriladi. Sayilgoh ko‘chasi uzoq yillardan buyon rassomlar, musiqachilar va shahar aholisi faol ishtirok etadigan jonli ko‘cha hayoti markazi sifatida shakllangan.

 

Mutasaddilarga ko‘ra, hududdagi piyodalar oqimining yuqoriligi va uning ijtimoiy-madaniy ahamiyati zamonaviy, barqaror va muvozanatli yechimlarni joriy etishni talab qilmoqda. O‘tkazilgan tahlillar piyodalar hududlari bilan bir qatorda unga tutash maydonlar — yashil zonalar, o‘tish yo‘laklari, yoritish, irrigatsiya tizimlari va tashqi ko‘rinishni bosqichma-bosqich yangilash zarurligini ko‘rsatgan.

 

Qayd etilishicha, loyiha Yagona dizayn-kod va hududni kompleks rivojlantirish tamoyillariga asoslangan. Tayyorgarlik jarayonida aholi va professional hamjamiyat takliflari o‘rganib chiqiladi.

 

 

Xabarga ko‘ra, hududning ochiq shahar muhiti saqlab qolinadi. Xususan, ko‘cha rassomlari va ijodiy jamoatchilik vakillari mazkur makonning ajralmas qismi bo‘lib qoladi. Loyiha ularning faoliyatini cheklash emas, balki tartibga solish va qulay sharoit yaratishga qaratilgan.

 

Ayni paytda hududning ayrim qismlarida qoplamalar eskirgani, piyodalar harakati uchun sharoit yetarli emasligi qayd etilgan. Shuningdek, to‘siqsiz muhitni rivojlantirish, obodonlashtirish elementlarini yangilash hamda savdo va qurilish faoliyatini amaldagi me’yorlarga moslashtirish zarurati mavjud.

 

Loyiha doirasida quyidagi ishlar amalga oshiriladi:

 

• yo‘l va piyodalar yo‘laklari qoplamasini yangilash;
• piyodalar yo‘nalishlari va o‘tish yo‘llarini takomillashtirish;
• to‘siqsiz muhit yaratish;
• hududni obodonlashtirish va ko‘kalamzorlashtirish;
• yoritish tizimini modernizatsiya qilish;
• irrigatsiya tizimini rivojlantirish;
• kichik me’moriy shakllar (o‘rindiqlar, chiqindi qutilari va boshqalar) o‘rnatish;
• favvoralarni rekonstruksiya qilish;
• reklama va peshlavhalarni yagona dizayn-kod asosida tartibga solish;
• noqonuniy qurilmalarni demontaj qilish;
• savdo faoliyatini tartibga keltirish;
• videokuzatuv va monitoring tizimlarini joriy etish.

 

Shuningdek, mavjud daraxtlar mutaxassislar tomonidan ko‘rikdan o‘tkazilmoqda. Qo‘shimcha ravishda kamida 1000 tup daraxt, buta va manzarali o‘simliklar ekish rejalashtirilgan.

 

Loyiha yakunida hududning o‘ziga xos qiyofasi va jonli muhitini saqlagan holda, uni aholi va mehmonlar uchun yanada qulay, yashil va xavfsiz zamonaviy makonga aylantirish maqsad qilingan.