Apple, Google, Meta va boshqa kompaniyalarning O‘zbekistonga qancha soliq to‘lagani ma’lum qilindi
Elektron xizmatlar ko‘rsatuvchi xorijiy kompaniyalar 2026-yilning birinchi choragida 2025-yilning mos davriga nisbatan 81 foizga ko‘p soliq to‘lagan.
O‘zbekistonda elektron xizmatlar ko‘rsatuvchi xorijiy kompaniyalar tomonidan to‘langan soliqlar hajmi keskin oshdi. Bu haqda Soliq qo‘mitasi xabar berdi.
Ma’lum qilinishicha, 2026-yilning birinchi choragida mamlakatda faoliyat yuritayotgan 89 ta xorijiy IT va raqamli servis kompaniyasi jami 65,7 milliard so‘m soliq to‘lagan. Bu ko‘rsatkich o‘tgan yilning mos davriga nisbatan 81 foizga ko‘p.
Soliq tushumlari bo‘yicha yetakchilikni Apple egalladi — kompaniya 16,1 milliard so‘m soliq to‘lagan.
Keyingi o‘rinlardan Google (14,9 mlrd so‘m) hamda Meta (13,9 mlrd so‘m) joy oldi.
Shuningdek, TOP-10 talikdan Valve Corporation — 8 milliard so‘m, OpenAI — 2,5 milliard so‘m va Anthropic — 1,5 milliard so‘m soliq to‘lagan kompaniyalar sifatida o‘rin oldi.
Ro‘yxatdan, shuningdek, Midasbuy (1,3 mlrd so‘m), TikTok (868,3 mln so‘m), Booking.com (694,7 mln so‘m) va Netflix (570,4 mln so‘m) ham joy olgan.
Amaldagi tartibga ko‘ra, O‘zbekistonda elektron xizmat ko‘rsatuvchi xorijiy yuridik shaxslar har chorakdan keyingi oyning 20-sanasidan kechiktirmay soliq hisobotlarini topshirishi va soliqlarni to‘lashi shart.
