Moldova parlamenti faoliyatida rus tilidan voz kechadi
Hukmron partiya tomonidan tayyorlangan hujjatga ko‘ra, rumin tili parlamentning yagona ishchi tili etib belgilanadi.
Moldova parlamenti qonunchilik organining tashkil etilishi va faoliyati to‘g‘risidagi kodeks loyihasini ma’qulladi. Unga ko‘ra, parlament faoliyatida rus tilidan foydalanish bekor qilinadi. Bu haqda “Unimedia” nashri xabar berdi.
Hujjatga muvofiq, rumin tili parlamentning yagona ishchi tili etib belgilanadi. Normativ-huquqiy hujjatlar rumin tilida tayyorlanib, qabul qilinadi va zarurat tug‘ilganda boshqa tillarga tarjima qilinadi.
Mazkur tashabbus hukmron “Harakat va birdamlik” (PDS) partiyasi deputatlari tomonidan ilgari surilgan bo‘lib, Yevropa Komissiyasining 2023–2025-yillarda Yevropa Ittifoqini kengaytirish bo‘yicha tavsiyalarini amalga oshirishga qaratilgani ta’kidlanmoqda.
PDS deputati Igor Talmazan bu qaror parlamentning ish jarayonida rus tiliga majburiy tarjimani bekor qilish va barcha rasmiy muloqotni rumin tilida olib borish zarurligini ko‘zda tutishini bildirgan.
Moldova 2022-yilda Yevropa Ittifoqiga a’zo bo‘lish uchun ariza berganidan so‘ng Yevrointegratsiya yo‘lini faollashtirgan. 2024-yilda esa mamlakatda Yevropa Ittifoqiga qo‘shilish bo‘yicha referendum o‘tkazilib, unda ko‘pchilik fuqarolar qo‘llab-quvvatlagan.
Shuningdek, Moldova MDHdan chiqish jarayonini ham boshlagani qayd etilgan. Rasmiy ma’lumotlarga ko‘ra, tegishli hujjatlar bekor qilingach, mamlakat tashkilotdan huquqiy jihatdan chiqishi kutilmoqda.
