Prezident Shavkat Mirziyoyev Xotira va qadrlash kuni munosabati bilan tabrik yo‘lladi
Tabrikda Ikkinchi jahon urushida ishtirok etgan o‘zbekistonliklarning fidoyiligi va tarixiy hissasi alohida qayd etildi.
Prezident Shavkat Mirziyoyev O‘zbekiston xalqini qutlug‘ ayyom — Xotira va qadrlash kuni hamda Ikkinchi jahon urushida qozonilgan buyuk g‘alabaning 81 yilligi munosabati bilan samimiy muborakbod etdi.
Prezident o‘z tabrigida jang maydonlarida fashizmga qarshi kurashgan qahramon ajdodlarimiz xotirasini yod etib, bugungi kunda hayot bo‘lgan urush va mehnat faxriylariga yuksak hurmat va ehtirom bildirilishini ta’kidladi.
Davlat rahbari Ikkinchi jahon urushi davrida o‘zbekistonliklarning front va orqa jabhalardagi fidoyiligi, xalqimizning insonparvarlik va bag‘rikenglik namunasini ko‘rsatganini alohida qayd etdi.
Ushbu yillarda Toshkentda barpo etilgan “G‘alaba bog‘i”, “Xotira nuri” va “Millat fidoyilari” yodgorlik majmualari xalq xotirasi va qadriyatlarini ulug‘lovchi maskanlarga aylangani ta’kidlandi.
Shuningdek, urush va mehnat faxriylarini qo‘llab-quvvatlash, ularning ijtimoiy himoyasini kuchaytirish bo‘yicha davlat darajasida amalga oshirilayotgan ishlar davom etayotgani qayd etildi.
Prezident bugungi murakkab davrda tinchlik, barqarorlik, millatlararo totuvlik va hamjihatlikni asrash har qachongidan ham muhim ekanini ta’kidladi.
Tabrik yakunida davlat rahbari barcha yurtdoshlarga sihat-salomatlik, tinchlik va farovonlik tiladi hamda Xotira va qadrlash kuni barchaga muborak bo‘lishini bildirdi.
