Putin yaratgan “ajdodlarga sig‘inish siyosati” endi unga qarshi ishlamoqda — WSJ
Ukrainaga qarshi urush davomiyligi Ikkinchi jahon urishidan ham oshib ketgani Rossiyada Putinga bo‘lgan ishonchni kamaytiryapti.
Rossiya prezidenti Vladimir Putin tomonidan yillar davomida shakllantirilgan 9-may va Ikkinchi jahon urushi atrofidagi davlat mafkurasi endi Kremlning o‘ziga qarshi ishlay boshladi. Bu haqda The Wall Street Journal'ga tayanib, "Unian" yozmoqda.
Qayd etilishicha, Ukrainaga qarshi urush davomiyligi bo‘yicha allaqachon Sovet Ittifoqining 1941–1945-yillardagi fashistlar Germaniyasiga qarshi urushidan oshib ketgan. Shu bilan birga, Ukraina dronlari Rossiya hududlariga tobora chuqurroq zarba bermoqda.
WSJ’ga ko‘ra, frontdagi turg‘unlik, Rossiya armiyasining katta yo‘qotishlari, iqtisodiy vaziyatning yomonlashuvi va mamlakat bo‘ylab dron hamda raketa hujumlari fonida Rossiya jamiyatida norozilik kayfiyati kuchaymoqda.
Nashr Putinning sobiq nutq yozuvchisi Abbos Gallyamovning fikrini keltiradi. Unga ko‘ra, Kreml tomonidan yillar davomida targ‘ib qilingan “bobolarga sig‘inish siyosati” endi aks ta’sir bera boshlagan.
“Shundan beri har bir kun biz bobolarimiz xotirasiga munosib emasligimiz hissini kuchaytirmoqda. Putin mana shu kultni yaratdi va endi bu uning o‘ziga qarshi ishlamoqda”, — degan Gallyamov.
WSJ qayd etishicha, Rossiyada hatto urush tarafdori bo‘lgan ayrim millatchilar ham mavjud vaziyatni tanqid qila boshlagan.
Jumladan, rossiyalik media vakili Anastasiya Kashevarova Telegram’dagi postida Ikkinchi jahon urushi qatnashchilari haqida gapirib: “Bu paytga kelib bobolarimiz allaqachon Berlinda edi, biz esa hanuz musht o‘qtalib, ‘qizil chiziqlar’ haqida gapirishda davom etyapmiz”, — deb yozgan.
Nashrga ko‘ra, Ukraina hujumlari Rossiya ichida xavfsizlik xavotirlarini kuchaytirmoqda. Endi Rossiyaning frontdan uzoq hududlari ham Ukraina dronlari yetib boradigan hudud sifatida qaralmoqda.
Karnegi markazi eksperti Aleksandr Baunovning aytishicha, Putin endi avvalgidek “himoyachi” yoki “superqahramon” sifatida qabul qilinmayapti.
WSJ shuningdek, 9-may paradi Kreml uchun ramziy bosimga aylanganini qayd etdi. Ekspertlar fikricha, xavfsizlik tahdidlariga qaramay, Kreml paradni bekor qila olmaydi, chunki 9-may Rossiyada deyarli “muqaddas siyosiy ramz” darajasiga ko‘tarilgan.
Ma’lumot o‘rnida, Moskvada 9-may paradida harbiy qurollar namoyish qilinmaydi. Bu bayram arafasida xavfsizlikni ta’minlash chorasi sifatida baholanmoqda.
