Qozog‘istonda vitse-prezident lavozimi joriy etiladi: parlament qonun loyihasini ma’qulladi

Qozog‘iston parlamenti “Prezident to‘g‘risida”gi konstitutsiyaviy qonun loyihasini birinchi o‘qishda ma’qulladi. Hujjatda mamlakatda vitse-prezident lavozimini joriy etish ham nazarda tutiladi. Bu haqda informburo.kz xabar berdi.

 

Ma’lum qilinishicha, qonun loyihasi parlamentda adliya vaziri Yerlan Sarsembayev tomonidan taqdim etilgan. Uning aytishicha, hujjat 15-mart kuni qabul qilingan yangi Konstitutsiyani amalga oshirish doirasida ishlab chiqilgan.

 

Loyihaga ko‘ra, vitse-prezident prezident tomonidan Qurultoy roziligi bilan tayinlanadi. Uning vakolatlari prezidentning alohida hujjatlari bilan belgilanadi.

 

 Vazirning ta’kidlashicha, bu davlat boshqaruvini yanada moslashuvchan tashkil etish va amaliy vazifalarga tez moslashish imkonini beradi. Vitse-prezident faoliyati esa davlat rahbari administratsiyasi tomonidan ta’minlanadi.

 

Qayd etilishicha, vitse-prezident prezident nomidan Qurultoy, hukumat va boshqa davlat idoralari bilan ishlaydi, muzokaralarda prezident vakili sifatida qatnashadi. Prezident muddatidan oldin lavozimini tark etgan taqdirda esa uning vakolatlari vitse-prezidentga o‘tadi.

 

Shuningdek, qonun loyihasida prezidentlikning bir martalik yetti yillik muddati, davlat rahbarining partiyasizligi hamda uning yaqin qarindoshlariga rahbarlik lavozimlarini egallashni taqiqlash normalari saqlab qolingan.

 

Shu bilan birga, prezident quyidagi vakolatlarga ega bo‘ladi:

 

— “Qazaqstan Xalq Kengesi” tarkibini tasdiqlash;

 

 — Inson huquqlari bo‘yicha vakilni tayinlash; 

 

— Qurultoy faoliyat yuritmayotgan davrda qonun maqomiga ega farmonlar chiqarish.

 

Qonun loyihasi parlament tomonidan birinchi o‘qishda ma’qullandi.