Saida Mirziyoyeva 61-Venetsiya biennalesi ochilishida ishtirok etdi
O‘zbekiston milliy pavilyoni —“The Aural Sea” loyihasi Orol dengizini ekologik fojia bilan bir qatorda xotira va ijodiy makon sifatida talqin etib, katta qiziqish uyg‘otdi.
Zamonaviy jahon san’atining eng nufuzli tadbirlaridan biri bo‘lgan Venetsiya biennalesi joriy yilda “In Minor Keys” (“Minor ohanglarda”) shiori ostida o‘tkazilmoqda. Mazkur mavzu zamonaviy dunyoni anglashdagi murakkab va nozik qarashlarni ifoda etishi bilan ahamiyatlidir.
61-Venetsiya biennalesi doirasida O‘zbekiston milliy pavilyoni — “The Aural Sea” loyihasi tantanali ravishda taqdim etildi. Tadbirda Saida Mirziyoyeva ishtirok etib, pavilyon ochilish marosimida nutq so‘zladi.
Loyiha Orol dengizi mavzusiga bag‘ishlangan bo‘lib, u nafaqat ekologik fojia sifatida, balki xalq xotirasi, afsona va ijodiy tasavvurlar makoni sifatida ham yoritilgan. Ekspozitsiya orqali Orolning mintaqa tarixidagi o‘rni va madaniy ahamiyati badiiy ifoda etilgan.
Tadbir davomida O‘zbekiston pavilyoni biennale ishtirokchilari va mehmonlari tomonidan katta qiziqish bilan kutib olindi. Mutaxassislar fikricha, ushbu loyiha xalqaro auditoriyada mamlakatimiz madaniy merosiga bo‘lgan qiziqishni oshirish va O‘zbekistonning zamonaviy san’atdagi o‘rnini yanada mustahkamlashga xizmat qiladi.
