To‘qayev Moskvadagi G‘alaba paradida qatnashadi
Kreml Qozog‘iston rahbarining tashrifini “do‘stona qadam” sifatida baholadi.
Qosim-Jomart To‘qayev Ikkinchi jahon urushidagi G‘alabaning 81 yilligi munosabati bilan o‘tkaziladigan tadbirlarda ishtirok etish uchun Moskva shahriga tashrif buyuradi.
Bu haqda Qozog‘iston prezidenti matbuot kotibi Oybek Smadiyarov ma’lum qildi.
Ma’lum qilinishicha, tashrif doirasida Vladimir Putin bilan alohida uchrashuv o‘tkazilishi rejalashtirilgan. Unda ikki davlat rahbari may oyi oxiriga mo‘ljallangan Rossiya prezidentining Qozog‘istonga tashrifi arafasida strategik hamkorlikning asosiy yo‘nalishlarini muhokama qiladi.
Kreml To‘qayevning bo‘lajak tashrifiga munosabat bildirib, uni “do‘stona qadam” sifatida baholagan.
Eslatib o‘tamiz, avvalroq Shavkat Mirziyoyev ham amaliy tashrif bilan Moskva shahriga jo‘nab ketgani va G‘alabaning 81 yilligiga bag‘ishlangan tadbirlarda ishtirok etishi xabar qilingan edi.
