Rossiya va Ukraina uch kunlik sulh tuzdi
Ushbu tashabbus AQSh prezidenti Donald Tramp tomonidan ilgari surilgan.
Rossiya 9–11-may kunlari Ukraina bilan vaqtinchalik sulh tuzish hamda shu davrda harbiy asirlarni “mingga ming” formatida almashish tashabbusini qo‘llab-quvvatlashini ma’lum qildi.
Rossiya prezidenti yordamchisi Yuriy Ushakov jurnalistlarga bergan bayonotida ushbu tashabbus AQSh prezidenti Donald Tramp tomonidan ilgari surilganini va Moskva uni maqbul deb hisoblashini bildirgan.
Uning ta’kidlashicha, Rossiya prezidenti Vladimir Putin topshirig‘iga binoan vaqtinchalik o‘t ochishni to‘xtatish hamda keng ko‘lamli mahbuslar almashinuvini amalga oshirish bo‘yicha rozilik tasdiqlangan.
Ma’lum qilinishicha, uch kunlik sulh davomida Rossiya va Ukraina o‘rtasida “mingga ming” tamoyili asosida harbiy asirlar almashinuvi tashkil etilishi rejalashtirilmoqda.
