Eron AQShning so‘nggi taklifiga javobini Pokiston orqali yetkazdi
Tehronning taklifi hozircha faqat harbiy harakatlarni to‘xtatishga qaratilgan.
Eron AQShning mamlakatga qarshi harbiy harakatlarni to‘xtatishga qaratilgan so‘nggi taklifiga oid rasmiy munosabatini Pokiston vositachilari orqali taqdim etdi. Bu haqda mazkur jarayondan xabardor manbaga tayanib, IRNA agentligi xabar berdi.
Manbaga ko‘ra, taqdim etilgan reja muzokaralarning hozirgi bosqichida, avvalo, mintaqadagi harbiy harakatlarni to‘xtatishga qaratilgan.
Avvalroq Eron Tashqi ishlar vazirligi vakili Tehron AQSh tomonidan ilgari surilgan takliflarni ichki muhokama va yakuniy xulosalardan so‘ng rasman ko‘rib chiqishini ma’lum qilgan edi.
Eslatib o‘tamiz, Pokiston joriy yilning 8-aprel kuni Tehron va Vashington o‘rtasida sulhga erishishda vositachilik qilgan. Ushbu jarayon AQSh va Isroilning Eronga qarshi qariyb 40 kun davom etgan qo‘shma harbiy harakatlarini to‘xtatishga xizmat qilgan.
Shuningdek, Tasnim agentligi ham Eron Tashqi ishlar vazirligidagi manbaga tayanib, Tehron AQShning so‘nggi taklifiga javob berganini tasdiqlagan. Biroq, javob tafsilotlari hozircha oshkor qilinmagan.
Anadolu agentligi ma’lumotiga ko‘ra, Pokiston kelasi hafta AQSh va Eron o‘rtasidagi muzokaralarning navbatdagi bosqichiga mezbonlik qilishi mumkin.
