Qirg‘izistonda erkak xotiniga qaynoq suv sepib, O‘zbekistonga qochib ketdi
Ayol 27 kun kasalxonada davolangan, eri va uning qarindoshlari tomonidan yordam ko‘rsatilmagan.
Qirg‘izistonning Osh shahrida oilaviy zo‘ravonlik bilan bog‘liq holat yuzasidan tergov olib borilmoqda. Bu haqda 24.kg nashri xabar berdi.
Ma’lum qilinishicha, Zarnibo ismli ayol shahar rahbariyati bilan uchrashuvda eri tomonidan zo‘ravonlikka uchraganini bildirgan. Uning so‘zlariga ko‘ra, 9-mart kuni turmush o‘rtog‘i yuziga ikki marotaba qaynoq suv sepgan va shundan so‘ng O‘zbekistonga qochib ketgan.
Jabrlanuvchi hujum oqibatida 27 kun davomida shifoxonada davolanganini ma’lum qilgan. Ayolning ta’kidlashicha, ushbu davrda eri hamda uning qarindoshlari tomonidan hech qanday yordam ko‘rsatilmagan.
“Men to‘rt nafar farzandim bilan yolg‘iz qoldim. Kasalxonaga hech kim kelmadi, yordam ham bo‘lmadi”, — degan ayol yig‘ilish davomida.
Uning aytishicha, holat yuzasidan huquqni muhofaza qiluvchi organlarga murojaat qilingan bo‘lsa-da, gumondor hali Qirg‘izistonga qaytarilmagan.
Shahar ichki ishlar boshqarmasi rahbari mazkur vaziyat nazoratga olinganini bildirib, gumondorni qo‘lga olish va mamlakatga qaytarish bo‘yicha choralar ko‘rilayotganini ma’lum qilgan.
Qirg‘iziston Ichki ishlar vazirligi ma’lumotiga ko‘ra, 2025-yilning dastlabki to‘qqiz oyida mamlakatda 16 mingdan ortiq oilaviy zo‘ravonlik holati qayd etilgan. Bosh prokuratura esa maishiy zo‘ravonlik bilan bog‘liq 656 ta jinoyat ishi qo‘zg‘atilganini bildirgan.
