Rossiya Oʻzbekistondan asalarilarni olib ketayotgan yuk mashinalarining “yoʻqolgani” haqidagi xabarlarni rad etdi
Oʻzbekistondan keltirilgan asalarilar importiga ruxsat berilmagan va yuklar qayta eksport qilingan.
Rossiya Ural bojxona boshqarmasi Oʻzbekistondan olib ketilayotgan asalarilar ortilgan ikkita yuk mashinasi bedarak yoʻqolgani haqidagi xabarlarni rad etdi. Bu haqda TASS agentligi bojxona maʼlumotiga tayanib хаbar berdi.
Qayd etilishicha, avvalroq ayrim ommaviy axborot vositalarida Oʻzbekistondan olib chiqilgan asalarilar yuklangan transport vositalari Rossiya chegarasini kesib oʻtgach, karantin hududiga yetib bormasdan Chelyabinsk viloyatida “gʻoyib boʻlgani” haqida xabarlar tarqalgan edi.
Ural bojxona boshqarmasi matbuot xizmati ushbu maʼlumotlarni inkor qilib, “xavfli asalarilarni tashiyotgan yuk mashinalarining yoʻqolgani haqidagi xabarlar haqiqatga toʻgʻri kelmaydi”, deya bayonot berdi.
Rasmiy maʼlumotga koʻra, asalarichilik kompaniyasi 2026-yil aprel oyida Chelyabinsk viloyatidagi “Bugristoye” nazorat-oʻtkazish punkti orqali Yevroosiyo iqtisodiy ittifoqi hududiga asalari paketlarini olib kirishga uringan.
Hujjatlar tekshirilgach, Rosselxoznadzor tomonidan Oʻzbekistondan asalarilar importi taqiqlangan. Shundan soʻng yuklarga nisbatan qayta eksport tartibi qoʻllanilib, jarayon 2-may kuni yakunlangan.
Bojxona idorasiga koʻra, barcha protseduralar amaldagi tartib asosida amalga oshirilgan.
