Harbiy xizmatchilarga yiliga bir martalik 100 BHMgacha moddiy yordam beriladi

 

Oliy Majlis Qonunchilik palatasining navbatdagi yalpi majlisida “Harbiy xizmatchilarning maqomi va ularning ijtimoiy himoyasi toʻgʻrisida”gi qonun loyihasi birinchi oʻqishda koʻrib chiqildi.

Mazkur qonun loyihasi harbiy xizmatchilarning huquqlari, imtiyozlari, kafolatlari va majburiyatlarini kompleks tarzda tartibga solishga qaratilgan boʻlib, Oʻzbekiston Qurolli Kuchlari tarkibiga kiruvchi vazirlik va idoralar harbiy xizmatchilarining huquqiy maqomini aniq belgilashni nazarda tutadi.

Hujjatda harbiy xizmatchilarning huquq va majburiyatlari, xizmat intizomi, masʼuliyati hamda ijtimoiy va huquqiy himoya mexanizmlari, shuningdek, ularning oila aʼzolari uchun kafolatlar mustahkamlanmoqda.

Qonun loyihasiga muvofiq, moddiy taʼminot, sifatli tibbiy xizmat, uy-joy bilan taʼminlash, majburiy davlat sugʻurtasi, pensiya taʼminoti hamda xizmat vazifasini bajarish chogʻida jarohat olish yoki halok boʻlish holatlarida kompensatsiya toʻlash kabi muhim ijtimoiy kafolatlar qonun darajasida mustahkamlanadi.

Shuningdek, kamida 20 yillik xizmat stajiga ega boʻlgan va harbiy xizmatdan boʻshatilgan harbiy xizmatchilar uchun yiliga bir marta imtiyozli asosda sanatoriy-kurort muassasalariga yoʻllanma berish tartibi joriy etilishi rejalashtirilmoqda. Bunda yoʻllanma qiymatining 75 foizi davlat byudjeti hisobidan qoplanadi.

Bundan tashqari, qonun loyihasida harbiy xizmatchilarga yiliga bir marta 100 bazaviy hisoblash miqdorigacha moddiy yordam koʻrsatish mexanizmi ham nazarda tutilgan.

Muhokamalar davomida deputatlar ushbu hujjat harbiy xizmat nufuzini oshirish, Vatan himoyachilarining ijtimoiy himoyasini kuchaytirish hamda ularning oila aʼzolari uchun ishonchli kafolatlar yaratishda muhim ahamiyat kasb etishini taʼkidladilar.

Muhokamalar yakunida qonun loyihasi deputatlar tomonidan birinchi oʻqishda qabul qilindi.