AQSh Senati Eron bilan urushni to‘xtatish rezolyutsiyasini yana rad etdi

 

AQSh Senati Eron bilan harbiy mojaroni tugatishga qaratilgan rezolyutsiyani yana rad etdi. Senatdagi ovoz berish yakunlariga ko‘ra, hujjatni 49 nafar senator qo‘llab-quvvatlagan bo‘lsa, 50 nafari unga qarshi ovoz bergan. Shu tariqa mazkur tashabbus Senatda ketma-ket yettinchi marotaba qabul qilinmay qoldi deb xabar beradi TASS.

Rezolyutsiya AQSh ma’muriyatini Eronga qarshi harbiy harakatlarni to‘xtatishga chaqirishni nazarda tutgan. Uni qo‘llab-quvvatlagan senatorlar orasida Respublikachilar partiyasining uch vakili — Rend Pol, Liza Murkovski va Syuzan Kollinz ham bo‘lgan. Demokratlar orasida esa Pensilvaniya shtati senatori Jon Fetterman hujjatga qarshi ovoz bergan yagona senator sifatida qayd etilgan.

AQSh va Eron o‘rtasidagi keskinlik so‘nggi oylarda yanada kuchaygan. AQSh va Isroilning Eronga qarshi harbiy amaliyotlari ortidan mintaqadagi xavfsizlik vaziyati murakkablashgan. Tomonlar o‘rtasida vaqtinchalik sulh e’lon qilinganiga qaramay, uzoq muddatli kelishuvga erishish bo‘yicha muzokaralar hozircha natija bermagan.

AQSh prezidenti Donald Tramp avvalroq Eron bilan ikki haftalik sulh rejimi joriy etilganini ma’lum qilgan edi. Keyinchalik Vashington sulh muddatini uzaytirish niyatini bildirgan. Biroq Eron tomoni AQShning bir tomonlama qarorlarini tan olmasligini va o‘z manfaatlari asosida harakat qilishini ma’lum qilgan.

Shuningdek, AQSh ma’muriyati may oyida Kongress rahbariyatiga Eron bilan urush yakunlangan deb hisoblanayotgani haqida rasman axborot yuborgan edi.

Eron tomoni esa mamlakat hududiga uyushtirilgan hujumlar oqibatida minglab odamlar halok bo‘lganini bildirgan.