Bir oyda 855 ming doza narkotik va 410 ming dona psixotrop vosita musodara qilindi
Aprel oyida o‘tkazilgan tezkor tadbirlar davomida 23 ta uyushgan jinoiy guruh faoliyatiga chek qo‘yildi.
Huquq-tartibot organlarining tezkor bo‘linmalari hamkorligida aprel oyida uyushgan narkojinoyatchilik hamda uyushgan jinoiy guruhlarga qarshi keng ko‘lamli tezkor tadbirlar amalga oshirildi.
O‘tkazilgan operatsiyalar natijasida narkotik moddalarni noqonuniy tarqatish bilan shug‘ullangan 13 ta uyushgan narko-jinoiy guruh faoliyatiga chek qo‘yilgan. Tezkor tadbirlar davomida 2 nafar guruh yetakchisi va 35 nafar a’zosi qo‘lga olingan.
Shuningdek, 4 ta yashirin narkolaboratoriya hamda 1 ta internet orqali faoliyat yuritgan narkodo‘kon fosh etilgan. Xalqaro hamkorlik doirasida nazorat ostida yetkazib berish bo‘yicha maxsus operatsiya ham o‘tkazilgan.
Tezkor tadbirlar davomida 285 kilogramm an’anaviy narkotik moddalar, 410 ming dona psixotrop dori vositalari hamda 42 litr noqonuniy prekursorlar musodara qilingan.
Mutaxassislar xulosasiga ko‘ra, ushbu jinoiy tarmoqlar faoliyati davom etganida bir yil ichida 2,6 million dona psixotrop vosita, 1,4 tonna “gashish” va “opiy”, shuningdek, katta miqdordagi sintetik narkotiklar noqonuniy muomalaga chiqarilishi mumkin edi.
Uyushgan guruhiy jinoyatchilikka qarshi kurash yo‘nalishida ham yirik natijalarga erishilgan. Xususan, 10 ta jinoiy guruh faoliyatiga barham berilib, 10 nafar yetakchi va 50 nafar a’zo qo‘lga olingan. Mazkur guruhlar 17 ta shahar va tumanda tadbirkorlarga bosim o‘tkazish, talonchilik, bezorilik, o‘g‘rilik hamda og‘ir tan jarohati yetkazish kabi jinoyatlarni sodir etib kelgan.
Bundan tashqari, tezkor tadbirlar doirasida Tojikiston Respublikasi huquqni muhofaza qiluvchi organlari bilan hamkorlikda xalqaro operatsiya ham amalga oshirilgan.
