Respublika bo‘ylab 12 kunda bolalarni me'yordan ortiq tashish bilan bog‘liq 170 ta holat aniqlandi
Tekshiruvlarda 3872 nafar bola sig‘imidan ortiq transportlarda olib ketilgani ma’lum bo‘ldi.
O‘zbekistonda maktabgacha yoshdagi bolalarni transport vositalarida xavfsiz tashish qoidalarini buzish holatlari davom etmoqda. Yo‘l harakati xavfsizligi xizmati tomonidan o‘tkazilgan nazorat tadbirlarida bolalarni belgilangan me’yorlardan ortiq va xavfli tarzda tashish bilan bog‘liq ko‘plab holatlar aniqlangan.
Yo‘l harakati xavfsizligining ma’lum qilishicha, 1–12-may kunlari davomida respublika bo‘ylab o‘tkazilgan tekshiruvlarda 170 ta qoidabuzarlik qayd etilgan. Ushbu holatlarda jami 3872 nafar bola sig‘imidan ortiq yuklangan transport vositalarida olib ketilayotgani aniqlangan.
Xususan, Sirdaryoda haydovchilik guvohnomasiga ega bo‘lmagan shaxs Damas avtomobilida 23 nafar bolani tashiyotgani ma’lum bo‘lgan. Namanganda ham huquqiy ruxsatsiz haydovchi 18 nafar bolani olib ketayotgan vaqtida to‘xtatilgan. Buxoroda esa 40 nafar bolani tashiyotgan avtobus haydovchisining mast holatda ekani aniqlangan.
Mutasaddilar bolalarni tashishda xavfsizlik talablariga qat’iy rioya qilish zarurligini eslatib, yo‘lovchilar sonini belgilangan me’yordan oshirish taqiqlanishini ta’kidlagan. Shuningdek, bolalar guruhlarini tashishda maxsus “Bolalar tashish” belgisi bo‘lishi va voyaga yetgan kuzatuvchilar hamrohligi ta’minlanishi lozimligi qayd etilgan.
