“Kichik yo‘lda 120 km/soat tezlikda harakatlangan” — Xorazmda IIB xodimi ishtirokidagi YTHda bir kishi vafot etdi
Mast haydovchi boshqaruvni yo‘qotib, avtomobil yo‘l chetidagi beton to‘siqqa urilgan va ag‘darilgan.
Xorazm viloyati Shovot tumanida mast holatda transport vositasini boshqargan ichki ishlar organlari xodimi ishtirokida yo‘l-transport hodisasi sodir bo‘ldi.
Kun.uz ma’lumotlariga ko‘ra, 2025-yil 23-dekabr kuni Urganch shahar IIB JXX HPB profilaktika katta bo‘lmagan inspektori sifatida ishlagan 30 yoshli D.Yu. spirtli ichimlik iste’mol qilganidan so‘ng “Cobalt” rusumli avtomashinani boshqargan. U bilan birga avtomobilda ikki nafar yo‘lovchi bo‘lgan.
Harakat davomida haydovchi boshqaruvni yo‘qotib, avtomobil yo‘l chetidagi beton to‘siqqa urilgan va ag‘darilgan. Oqibatda orqa o‘rindiqda bo‘lgan yo‘lovchi og‘ir tan jarohati olib, shifoxonada vafot etgan.
Sud materiallarida guvohning ko‘rsatmasiga ko‘ra, avtomobil kichik yo‘lda 120 km/soat tezlikda harakatlangan va bir necha yo‘l notekisliklaridan so‘ng ham tezlikni kamaytirmagan.
Sud majlisida ayblanuvchi o‘z aybiga to‘liq iqrorlik bildirgan va qilmishidan pushaymonligini ta’kidlagan.
JIB Shovot tuman sudi hukmiga ko‘ra, D.Yu. Jinoyat kodeksining 266-moddasi 2-qismi bilan aybli deb topilib, unga 4 yil ozodlikdan mahrum etish jazosi tayinlangan. Shuningdek, u 3 yil muddatga transport vositalarini boshqarish huquqidan mahrum qilindi. Jazoni manzil koloniyalarda o‘tash belgilangan.
