AQSh va Isroil Eronga qarshi yangi zarbalarni boshlashi mumkin — NYT
AQSh harbiylari sulhdan keyin to‘xtatilgan “Epik G‘azab” operatsiyasini qayta tiklash rejasini tayyorlamoqda.
AQSh prezidenti Donald Tramp Eronga nisbatan yangi harbiy operatsiyalarni boshlash ehtimolini ko‘rib chiqmoqda. Bu haqda The New York Times nashriga tayanib, NDTV World xabar berdi.
Ma’lum qilinishicha, Tramp Xitoy safaridan qaytgach, Oq uy va Pentagon diplomatik muzokaralardagi boshi berk vaziyatni harbiy yo‘l bilan hal qilish variantlari ustida ishlashni kuchaytirgan. Xususan, AQSh harbiylari o‘tgan oygi sulhdan keyin to‘xtatilgan “Epik G‘azab” operatsiyasini qayta tiklash rejasini tayyorlamoqda.
Manbalarga ko‘ra, AQSh va Isroil kuchlari sulhdan buyon eng yirik qo‘shma tayyorgarlik mashg‘ulotlarini olib bormoqda. Ehtimoliy zarbalar kelasi haftadayoq boshlanishi mumkinligi aytilmoqda.
Ayni paytda xalqaro vositachilar strategik ahamiyatga ega Hormuz bo‘g‘ozini qayta ochish bo‘yicha murosa izlayotgan bo‘lsa-da, Tramp Eronning navbatdagi tinchlik taklifini rad etgan.
“Men hujjatga qaradim. Agar birinchi jumlasi yoqmasa, uni shunchaki tashlab yuboraman”, degan Tramp Pekindan qaytayotib Air Force One bortida jurnalistlarga.
AQSh prezidenti Xitoy raisi Si Szinpin bilan muzokaralarda Eron masalasi ham muhokama qilinganini tasdiqlagan. Trampning aytishicha, Vashington va Pekin “Eron yadroviy qurolga ega bo‘lolmaydi” degan masalada umumiy pozitsiyaga ega.
Shuningdek, Tramp Si Szinpin Hormuz bo‘g‘ozining ochilishini qo‘llab-quvvatlashini bildirganini aytgan. Uning ta’kidlashicha, Eron so‘nggi ikki yarim hafta davomida bo‘g‘oz orqali deyarli savdo amalga oshirmagan va bu kuniga taxminan 500 million dollarlik yo‘qotishga teng.
Reuters xabariga ko‘ra, muzokaralarda Tayvan masalasi ham asosiy mavzulardan biri bo‘lgan. Si Szinpin Trampni Tayvan yuzasidan keskinlik AQSh va Xitoy o‘rtasida to‘qnashuvga olib kelishi mumkinligi haqida ogohlantirgan.
