Buxoroda Media haftalik yakunlandi: 800 dan ortiq ishtirokchi qamrab olindi
Media haftalik 18–22-may kunlari mamlakatning vodiy hududlarida davom etishi rejalashtirilgan.
Buxoroda o‘tkazilgan media haftalik yakuniga ko‘ra, ishtirokchilar o‘z professional pozitsiyasini shakllantirish, auditoriyani to‘g‘ri tahlil qilish hamda tezkorlik va aniqlikni uyg‘unlashtirish bo‘yicha amaliy bilim va ko‘nikmalarga ega bo‘ldilar.
Tadbir davomida kontent yaratishda kreativ yondashuvni rivojlantirish, trendlarni kuzatish bilan cheklanmasdan ularni yaratish tamoyillari asosiy yo‘nalish sifatida belgilandi. Shuningdek, sun’iy intellekt imkoniyatlari kontent ishlab chiqarish jarayonida yordamchi vosita emas, balki ijodiy jarayonni kuchaytiruvchi muhim omil sifatida amaliy sinovdan o‘tkazildi.
Ishtirokchilar tomonidan kontent sifati uning tashqi ko‘rinishidan ko‘ra, ortidagi fikr, yondashuv va professional pozitsiya bilan baholanishi alohida ta’kidlandi.
Ma’lumotlarga ko‘ra, media haftalik doirasida 53 nafar matbuot kotibi va axborot xizmati xodimi, 19 nafar televideniye sohasi vakili, 15 ta gazeta va internet OAV vakili, 14 nafar bloger, 80 dan ortiq mobilograf, 80 dan ortiq SMM mutaxassisi hamda 200 nafar yosh kontent yaratuvchi qamrab olindi. Yakuniy media forumda esa 700 dan ortiq ishtirokchi jamlandi. Umumiy hisobda tadbir 800 dan ortiq ishtirokchini qamrab oldi.
Media haftalik 18–22-may kunlari mamlakatning vodiy hududlarida davom etishi rejalashtirilgan bo‘lib, keyingi bosqichda Farg‘ona va Namangan viloyatlari parallel ravishda yangi g‘oyalar va media-innovatsiyalar maydoniga aylanadi.
