Insoniyat yangi iqlim falokati xavfi ostida qolishi mumkin
“El Nino” iqlim siklining oziq-ovqat xavfsizligi, suv ta’minoti va jahon iqtisodiyotiga jiddiy tahdid solishi ehtimoli bor.
Olimlar XIX asrda o‘nlab millionlab odamlarning o‘limiga sabab bo‘lgan kuchli “El Nino” iqlim siklining yana takrorlanish ehtimolidan ogohlantirmoqda. Bu haqda The Washington Post xabar berdi.
“El Nino” — Tinch okeanining tropik sharqiy va markaziy qismida suv haroratining keskin isishi bilan bog‘liq iqlim hodisasi bo‘lib, u har bir necha yilda kuzatiladi. Mutaxassislar fikricha, bu yil okean harorati me’yordan 3 darajagacha yuqori bo‘lishi va yangi rekordlarni o‘rnatishi mumkin.
Nashr eslatishicha, 1877–1878-yillarda kuzatilgan eng kuchli “El Nino” Hindiston, Xitoy, Braziliya va boshqa davlatlarda global ocharchilikka sabab bo‘lgan. Tadqiqotlarga ko‘ra, o‘sha davrda 50 milliondan ortiq odam halok bo‘lgan. Bu o‘sha paytdagi dunyo aholisining taxminan 3–4 foiziga teng edi. Hozirda bu ko‘rsatkich 250 million kishiga to‘g‘ri keladi.
Olimlar shunga o‘xshash iqlim inqirozi hozir ham takrorlanishi mumkinligini istisno qilmayapti. Vashington davlat universiteti dotsenti Dipti Sinxning ta’kidlashicha, 1870-yillardagi kabi bir vaqtning o‘zida bir necha mintaqada ko‘p yillik qurg‘oqchiliklar kuzatilishi ehtimoli mavjud.
Uning so‘zlariga ko‘ra, hozir atmosfera va okeanlar XIX asrdagidan ancha issiqroq bo‘lgani uchun ekstremal ob-havo hodisalari yanada kuchli kechishi mumkin.
Mutaxassislar “super El Nino” oziq-ovqat xavfsizligi, suv ta’minoti va jahon iqtisodiyotiga jiddiy tahdid solishi mumkinligidan ogohlantirmoqda. Ularning fikricha, bu global ijtimoiy-iqtisodiy tizimlarga ham salbiy ta’sir ko‘rsatishi mumkin.
