“Sehrli chapaqay”: Sport va oilaviy qadriyatlar haqida yangi film
Film yoshlarni vatanparvarlik, qat’iyat va sog‘lom turmush tarziga ruhlantirishni maqsad qilgan.
15-may kuni “Renessans kino uyi”da “Sehrli chapaqay” badiiy filmining yopiq namoyishi bo‘lib o‘tdi. Tadbir Kinematografiya agentligi, Prezident Administratsiyasi huzuridagi Ommaviy axborot vositalari uchun kontent tayyorlash markazi, “Your Films Entertainment”, O‘FF hamda Respublika Ma’naviyat va ma’rifat markazi hamkorligida tashkil etildi.
Film sport, oila va jamiyat qadriyatlarini aks ettiruvchi hayotiy voqealar asosida suratga olingan bo‘lib, tomoshabinga ruhiy motivatsiya, ishonch va g‘alabaga intilish hissini ulashadi.
Shuningdek, kartinada farzandlarni ularning qobiliyatidan kelib chiqib kasbga yo‘naltirish va bu yo‘lda ularni qo‘llab-quvvatlash g‘oyasi ham ilgari suriladi.
Film syujeti ota va bola o‘rtasidagi munosabatlar, ona mehri, tarbiya, do‘stlik hamda jamoa ruhiga qurilgan. Voqealar davomida bosh qahramonning murakkab hayot yo‘li, sportdagi sinovlari, mag‘lubiyat va umidsizliklarga qarshi kurashi, shuningdek, qat’iyat bilan maqsad sari intilishi dramatik tarzda yoritiladi.
Ta’kidlanishicha, “Sehrli chapaqay” faqat sport haqida emas, balki insoniylik, halollik, adolat va kuchli iroda haqida hikoya qiluvchi film hisoblanadi. Kartina markazida farzandi kamoli uchun kurashadigan ota obrazi orqali chuqur hayotiy ibrat g‘oyasi ilgari surilgan.
Film yoshlarni vatanparvarlik, qat’iyat va sog‘lom turmush tarziga ruhlantirishni maqsad qilgan. Shu bilan birga, unda mamlakatda sport sohasida olib borilayotgan islohotlar, yaratilayotgan imkoniyatlar va ularning amaliy natijalari ham keng jamoatchilikka namoyish etiladi.
Film ssenariysi muallifi va rejissyori — Habibulloh Haydar. Prodyuser — Fozil Yunusov. Asosiy rollarni Sirojiddin Sattorov, Muhammad Nurmuhammadov, Tohir Saidov, Shahlo Temirova, O‘lmas Temur, Ardasher Abdulhayev o‘g‘li hamda Murod Nasimov ijro etgan.
Abdullayeva Shaxrizoda
