Fransiyada Saudiya valiahd shahzodasiga qarshi tergov boshlandi
Muhammad bin Salmon Al Saud jurnalist Jamol Qoshiqchining qiynoqqa solinishi va majburan yo'qolib qolishiga aloqadorlikda ayblanmoqda.
Fransiyada Saudiya Arabistoni valiahd shahzodasi Muhammad bin Salmon Al Saudga nisbatan saudiyalik jurnalist Jamol Qoshiqchining o‘ldirilishi va majburiy yo‘qolishi yuzasidan sud tergovi boshlandi. Bu haqda Agence France-Presse agentligi xabar berdi.
Fransiya Milliy terrorizmga qarshi prokuraturasi ma’lumotiga ko‘ra, insoniyatga qarshi jinoyatlar bo‘limi tergovchi sudyasi endilikda Trial International hamda “Chegara bilmas muxbirlar” tashkilotlari tomonidan berilgan shikoyat asosida ish olib boradi.
Muhammad bin Salmon Al Saud jurnalist Jamol Qoshiqchining qiynoqqa solinishi va majburan yo‘qolishiga aloqadorlikda ayblanmoqda.
Mazkur shikoyat dastlab 2022-yilda, Saudiya Arabistoni valiahd shahzodasining Fransiyaga rasmiy tashrifi arafasida “Democracy for the Arab World Now” (DAWN) va Trial International tomonidan taqdim etilgan edi. Keyinchalik “Chegara bilmas muxbirlar” ham ushbu murojaatga qo‘shilgan.
Avvalroq Fransiya prokuraturasi tergov boshlashga qarshi bo‘lgan, biroq Parij Apellyatsiya sudi 11-may kuni tashkilotlar talabini qanoatlantirgan.
Jamol Qoshiqchi 2018-yil 2-oktabr kuni Saudiya Arabistonining Istanbuldagi bosh konsulligiga kirganidan so‘ng bedarak yo‘qolgan edi. Keyinchalik Ar-Riyod jurnalist konsullik binosidagi mojaro oqibatida halok bo‘lganini ma’lum qilgan.
2021-yilda AQSH Milliy razvedka direktori idorasi e’lon qilgan hisobotda operatsiya Saudiya Arabistoni valiahd shahzodasi tomonidan ma’qullangani qayd etilgan. Saudiya Arabistoni esa bu ayblovlarni rad etib kelmoqda.
