Surxondaryoda Afg‘onistondan olib kirilgan qariyb 600 kg narkotik musodara qilindi
Jinoiy guruh narkotik moddalarni tong saharda yashirin ravishda olib o‘tishga uringan.
Surxondaryoda Afg‘onistondan olib kirilayotgan qariyb 600 kilogramm narkotik moddalar to‘xtatib qolindi. Bu haqda Davlat xavfsizlik xizmati ma’lum qildi.
Qayd etilishicha, DXX tezkor bo‘linmalari, Chegara qo‘shinlari hamda Bojxona qo‘mitasi xodimlari hamkorligida o‘tkazilgan tezkor-qidiruv tadbirlari davomida yirik miqdordagi narkotik moddalarning noqonuniy olib kirilishiga chek qo‘yilgan.
Ma’lumotlarga ko‘ra, jinoiy guruh tong sahar vaqtida chegara nazorati sustlashishidan foydalanib, taqiqlangan moddalarni mamlakat hududiga olib kirishni rejalashtirgan.
Xususan, Afg‘oniston fuqarosi boshqaruvidagi “Mercedes” rusumli yuk avtomashinasi Surxondaryodagi “Termiz-avto” chegara bojxona postida belgilangan tartibda tekshiruvdan o‘tkazilgan.
Tekshiruv jarayonida avtomashina tirkamasida olib kelinayotgan “Doosan” rusumli ekskavator inspeksion ko‘rik majmuasi orqali skaner qilinganda, uning ko‘taruvchi qismi ichida shubhali jismlar mavjudligi aniqlangan.
Shundan so‘ng maxsus texnik vositalar yordamida o‘tkazilgan qo‘shimcha ko‘zdan kechirish ishlari davomida ekskavatorning “strelasi” ichiga yashirilgan 593 kilogramm “gashish” va 3 kilogramm “opiy” moddasi borligi fosh etilgan.
Hozirda mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, narkotik vositalarning egalarini aniqlash va qo‘lga olish bo‘yicha tezkor tadbirlar davom ettirilmoqda.
