Toshkent viloyatida konditsioner ortilgan yuk mashinasi yonib ketdi
Yong‘in konditsioner ortilgan tirkama yukxonasida kelib chiqqan.
Toshkent viloyatining Piskent tumanida yuk mashinasida olib ketilayotgan konditsionerlar yonib ketdi. Hodisa yuzasidan surishtiruv ishlari olib borilmoqda.
Viloyat IIBB YHXB ma’lumotiga ko‘ra, voqea 16-may kuni soat taxminan 17:00 larda A-373a “Toshkent–O‘sh” avtomobil yo‘lining Piskent tumani hududidan o‘tgan 10-kilometrida sodir bo‘lgan.
1983-yilda tug‘ilgan haydovchi boshqaruvidagi “Scania” rusumli yuk avtomashinasi harakatlanib ketayotgan vaqtda unga ulangan tirkama yukxonasida bo‘lgan yuk — konditsionerlarda yong‘in kelib chiqqan.
Oqibatda yuk ortilgan tirkama to‘liq yonib ketgan. Yuk avtomashinasining o‘zi esa tirkama o‘z vaqtida ajratib olingani sababli shikastlanmagan.
Qayd etilishicha, hodisa natijasida fuqarolarning sog‘lig‘iga zarar yetmagan.
Hozirda mazkur holat yuzasidan Piskent tumani Favqulodda vaziyatlar bo‘limi tomonidan surishtiruv ishlari olib borilmoqda.
