Davlat xaridlarida 23 milliard so‘mdan ortiq qonunbuzilishlar aniqlandi
Aniqlangan holatlar yuzasidan buyurtmachi tashkilotlarga nisbatan ish qo‘zg‘atilib, mansabdor shaxslarga tegishli choralar ko‘rilgan.
Qo‘mita ma’lumotiga ko‘ra, o‘tkazilgan o‘rganishlar natijasida bir nechta davlat tashkilotlari tomonidan amalga oshirilgan umumiy qiymati 23 milliard so‘mdan ortiq bo‘lgan davlat xaridlarida qonunbuzilish holatlari aniqlangan.
Xususan:
— Yoshlar ishlari agentligi tomonidan o‘tkazilgan umumiy qiymati 9,1 milliard so‘mdan ortiq bo‘lgan 6 ta davlat xaridida;
— Innovatsion rivojlanish agentligi tomonidan tashkil etilgan qariyb 8 milliard so‘mlik 6 ta tanlov savdosida;
— Maktabgacha va maktab ta’limi vazirligi tomonidan amalga oshirilgan 6,7 milliard so‘mga yaqin qiymatdagi 10 ta tender jarayonida qonunchilik talablari buzilgani aniqlangan.
Ta’kidlanishicha, ushbu savdolarda raqobatni cheklovchi yoki cheklanishiga olib kelishi mumkin bo‘lgan holatlarga yo‘l qo‘yilgan.
Aniqlangan holatlar yuzasidan Raqobat qo‘mitasining Maxsus komissiyasi tomonidan buyurtmachi tashkilotlarga nisbatan belgilangan tartibda ish qo‘zg‘atilib, qonunbuzilishlarni bartaraf etish hamda kelgusida bu kabi holatlarning takrorlanishiga yo‘l qo‘ymaslik yuzasidan bajarilishi majburiy bo‘lgan ko‘rsatmalar berilgan.
Bundan tashqari, qonunbuzilishlarga yo‘l qo‘ygan ayrim mansabdor shaxslarga nisbatan ma’muriy javobgarlik choralari qo‘llash masalasi ko‘rib chiqilib, tegishli materiallar sud organlariga yuborilgan.
