Eron kelishuvga rozi bo‘lmasa, qattiq zarbaga uchraydi— Tramp
Donald Tramp Tehronni AQSh bilan ehtimoliy kelishuv bo‘yicha tezroq harakat qilishga chaqirdi.
Donald Tramp Eron bilan kelishuvga erishilmagan taqdirda, Tehronga qarshi harbiy zarbalar yanada kuchaytirilishi mumkinligini ma’lum qildi. Bu haqda Axios nashri xabar berdi.
Amerika yetakchisi nashrga bergan intervyusida Vashington Eron bilan kelishuvga erishishni istayotganini, biroq Tehron hali AQSh kutayotgan pozitsiyaga kelmaganini ta’kidladi.
“Biz kelishuvga erishmoqchimiz. Ular hozir biz xohlagan nuqtada emas. Agar murosaga kelinmasa, ularga yanada qattiq zarbalar beriladi”, — dedi Tramp.
Axios ma’lumotiga ko‘ra, AQSh prezidenti 19-may kuni Eron bo‘yicha keyingi harbiy variantlarni muhokama qilish uchun milliy xavfsizlik guruhi a’zolari bilan uchrashuv o‘tkazishni rejalashtirmoqda.
Shuningdek, nashr manbalarining bildirishicha, Tramp avvalroq vitse-prezident J. D. Vens, maxsus vakil Stiv Uitkoff, davlat kotibi Marko Rubio hamda Markaziy razvedka boshqarmasi direktori Jon Retkliff bilan Eron atrofidagi vaziyatni muhokama qilgan.
AQSh prezidenti avval ham Tehronni Vashington bilan ehtimoliy kelishuv bo‘yicha tezroq qaror qabul qilishga chaqirib, “vaqt juda muhim” ekanini bildirgan edi.
Eslatib o‘tamiz, AQSh va Isroil 28-fevral kuni Eronga qarshi harbiy zarbalar bergan. Bunga javoban Eron Hormuz bo‘g‘ozini yopganini ma’lum qilgan edi. Keyinchalik tomonlar o‘rtasida vaqtinchalik sulh e’lon qilingan, biroq mintaqadagi keskinlik hanuz saqlanib qolmoqda.
