Namangandagi video noto‘g‘ri talqin qilingan — Milliy gvardiya
Ijtimoiy tarmoqlarda tarqalgan “Milliy gvardiya xodimi va chet el fuqarosi o‘rtasidagi tortishuv” videosi yuzasidan izoh berildi.
Ijtimoiy tarmoqlarda “o‘zini chet el fuqarosi deb tanishtirgan shaxs va Milliy gvardiya xodimlari o‘rtasidagi tortishuv” mazmunidagi videotasvir keng muhokamalarga sabab bo‘ldi. Mazkur holat yuzasidan O‘zbekiston Milliy gvardiyasi rasmiy izoh berdi.
Ma’lum qilinishicha, voqea joriy yilning 25-fevral kuni Namangan shahridagi Bobur istirohat bog‘i hududida sodir bo‘lgan.
Unga ko‘ra, jamoat tartibini saqlash va fuqarolar xavfsizligini ta’minlash maqsadida xizmatga jalb etilgan gvardiyachilar tomonidan belgilangan bo‘lmagan joyda tamaki mahsulotini iste’mol qilayotgan fuqaro to‘xtatilgan. Suhbat davomida u o‘zini chet el fuqarosi sifatida tanishtirib, qo‘pol muomala qilgan.
Shunga qaramay, gvardiyachilar tomonidan unga O‘zbekiston qonunchiligida belgilangan tartib-qoidalar, xususan jamoat joylarida tamaki iste’moli taqiqlangani haqida tushuntirish berilgan. Ushbu jarayon chet el fuqarosining sherigi tomonidan videoga olingan.
Keyinchalik o‘tkazilgan o‘rganishlar natijasida ushbu shaxs Qozog'iston fuqarosi R. Ergashev ekani aniqlangan. U bilan tushuntirish ishlari olib borilgach, u o‘z xatti-harakatlarini tan olgan va tegishli xulosa chiqarganini bildirgan.
Shuningdek, rasmiylar videoni buzib talqin qilgan holda tarqatish holatlari jamoatchilikni chalg‘itishi mumkinligi haqida ogohlantirgan.
