Toshkent shahar hokimiga piyodalar xavfsizligi bo‘yicha senator so‘rovi yuborildi
Bektemir tumani Nurafshon mahallasida bog‘cha va maktab yo‘qligi tufayli bolalar hayoti xavfga qo‘yilmoqda. Ular Mirobod tumanidagi taʼlim muassasalariga borish uchun Toshkent halqa avtomobil yo‘lini kesib o‘tishga majbur bo‘lyapti. Senator o‘z so‘rovida Shavkat Umrzoqovdan ko‘riladigan choralar yuzasidan axborot berishni so‘ragan.
Senatning Mudofaa va xavfsizlik masalalari qo‘mitasi raisi Qutbiddin Burxonov Toshkent shahar hokimi Shavkat Umrzoqovga so‘rov yubordi. Unda Bektemir tuman aholisini xavotirga solayotgan muammolar tilga olingan.
Xususan, tumanning Nurafshon mahallasida maktabgacha taʼlim tashkiloti va umumtaʼlim maktabi yo‘qligi tufayli, bolalar Toshkent halqa avtomobil yo‘lini majburan kesib, qo‘shni Mirobod tumaniga qatnayotgani aniqlangan.
Senat ishchi guruhi o‘rganishlari davomida, Nurafshon mahallasi Porloq ko‘chasini Mirobod tumani Qo‘yliq ota ko‘chasi bilan bog‘lovchi yerosti piyodalar o‘tish yo‘lagini qurish bo‘yicha tegishli ishlar olib borilayotgani maʼlum bo‘lgan.
“Shu munosabat bilan senator so‘rovida mazkur loyiha 2026-yil dasturiga kiritilgan-kiritilmagani, uni amalga oshirish uchun zarur mablag‘ ajratilgani, mablag‘ ajratilmagan bo‘lsa, muammoni hal etish bo‘yicha qanday choralar ko‘rilayotgani haqida maʼlumot taqdim etish so‘ralgan”- deyiladi axborotda.
Shuningdek, so‘rovda ushbu yo‘lak foydalanishga topshirilgunga qadar vaqtinchalik piyodalar o‘tish joyi tashkil etish, svetofor o‘rnatish yoki yo‘l-patrul xizmati xodimlarining doimiy nazoratini yo‘lga qo‘yish yuzasidan batafsil axborot berish qayd etilgan.
