U-17 Osiyo kubogi. O‘zbekiston final ostonasida mag‘lubiyatga uchrab turnirni tark etdi
Yaponiya penaltilar seriyasida omadliroq chiqdi.
Saudiya Arabistonida bo‘lib o‘tayotgan U-17 Osiyo kubogining yarim final uchrashuvidan o‘rin olgan Yaponiya — O‘zbekiston bahsi yakuniga yetdi.
Uchrashuvni yaxshi boshlagan kichik "oq bo‘rilar" 27-daqiqada Asilbek Aliyev tomonidan kiritilgan gol evaziga hisobda oldinga chiqib oldi. Ammo uchrashuvning asosiy vaqtiga qo‘shib berilgan daqiqalarning so‘ngida yaponlar hisobni tenglashtirib ketdi va o‘yinni penaltilar seriyasiga qadar olib bordi.
"Lotereya"da esa kunchiqar yurt vakillari 3:2 hisobida ustun keldi va musobaqa finaliga yo‘llanma oldi.
Ma’lumot o‘rnida, Sergey Chigodaev boshchiligidagi O‘zbekiston o‘smirlar terma jamoasi avvalroq ushbu musobaqaning chorak finaliga chiqishi bilan birga shu yil noyabr oyida bo‘lib o‘tadigan U-17 Jahon chempionatida ishtirok etish huquqini ham qo‘lga kiritgandi.
