Farg‘ona va Namanganda yirik miqdordagi narkotik moddalar musodara qilindi
Har ikki holat yuzasidan jinoyat ishlari qo‘zg‘atilib, tergov harakatlari olib borilmoqda.
Farg‘ona va Namangan viloyatlarida narkotik moddalarning noqonuniy aylanmasiga qarshi o‘tkazilgan tezkor tadbirlarda yirik miqdordagi giyohvandlik vositalari va kuchli taʼsir qiluvchi dori preparatlari aniqlandi. Bu haqda DXX xabar berdi.
Maʼlum qilinishicha, Davlat xavfsizlik xizmatining Farg‘ona viloyati bo‘yicha boshqarmasi xodimlari tomonidan bojxona va ichki ishlar organlari bilan hamkorlikda Farg‘ona tumani Log‘on mahallasida joylashgan xonadon ko‘zdan kechirilgan.
Tekshiruv davomida ushbu manzilda yashovchi 2000-yilda tug‘ilgan fuqaroga tegishli 993 gramm “gashish”, 212 gramm “Alfa-PVP” narkotik moddasi, shuningdek, 2728 dona “Regapen” va 458 dona “Tropikamid” kuchli taʼsir qiluvchi dori vositalari ashyoviy dalil sifatida rasmiylashtirib olingan.
Shuningdek, Davlat xavfsizlik xizmatining Namangan viloyati bo‘yicha boshqarmasi, ichki ishlar va bojxona organlari xodimlari hamkorligida o‘tkazilgan tezkor tadbirda “Toshkent–Namangan” yo‘nalishida harakatlanayotgan “Spark” rusumli avtomobil Chust tumani hududida to‘xtatilib tekshirilgan.
Natijada, unda ketayotgan Namangan shahrida yashovchi 1992-yilda tug‘ilgan shaxs hamda Davlatobod tumanida yashovchi 1997-yilda tug‘ilgan fuqarodan 1 kilogramm 127 gramm “opiy” moddasi olingan.
Har ikki holat yuzasidan jinoyat ishlari qo‘zg‘atilib, tergov harakatlari davom ettirilmoqda.
