Namanganda gilos yeyman deb transformator ustiga chiqqan 13 yoshli bola tok urib vafot etdi
Marhum bolaning qarindoshlari transformator hududida xavfsizlik choralari yetarli bo‘lmaganini ta‘kidlamoqda.
Namangan viloyatining Davlatobod tumanida 13 yoshli bola yuqori kuchlanishli transformator ustiga chiqib, elektr toki urishi oqibatida vafot etdi. Holat yuzasidan tergovga qadar tekshiruv harakatlari olib borilmoqda. Bu haqda Millar dasturida ma'lum qilindi.
Mas’ullar ma’lumotiga ko‘ra, hodisa 5-may kuni taxminan soat 19:37 larda sodir bo‘lgan. Dastlabki ma’lumotlarda aytilishicha, 2013-yilda tug‘ilgan bola gilos uzish maqsadida mahallada joylashgan yuqori kuchlanishli transformator ustiga chiqqan vaqtida elektr toki ta’siriga tushgan.
Ma’lum bo‘lishicha, marhum bola xolasining qarovida bo‘lgan, onasi esa xorijda ishlagan. Qarindoshlarining aytishicha, bola maktabdan qaytgach, ko‘chaga tengdoshlari bilan futbol o‘ynash uchun chiqqan.
Voqeadan so‘ng qo‘shnilar tomonidan bolaga birinchi yordam ko‘rsatishga urinish bo‘lgan. Shundan keyin u yaqin hududdagi shifoxonaga olib borilgan. Voqea yuzasidan oila a’zolari tomonidan shoshilinch yordam ko‘rsatish jarayoni bilan bog‘liq ayrim holatlarga ham e’tiroz bildirilgan. Ularning aytishicha, bola dastlab yaqin atrofdagi tibbiyot muassasasiga olib borilgan, biroq u yerda tezkor tibbiy yordam ko‘rsatilishi borasida kechikishlar bo‘lgan.
Marhumning yaqinlari transformator atrofida xavfsizlik to‘siqlari va zarur himoya choralari bo‘lmaganini ta’kidladi. Ularning fikricha, hudud yetarli darajada o‘ralmagan va transformator xavfsiz holatga keltirilmagan.
Hodisa joyiga tuman prokuraturasi hamda ichki ishlar organlarining tezkor-tergov guruhi yetib borgan. Bola o‘limining aniq sabablarini aniqlash maqsadida sud-tibbiy ekspertizasi tayinlangan.
Bosh prokuratura holat yuzasidan tergovga qadar tekshiruv ishlari olib borilayotganini ma’lum qildi. Shuningdek, Davlatobod tuman elektr ta’minoti korxonasi xodimlari faoliyati yuzasidan xizmat tekshiruvi tayinlangan.
Ma’lumotlarga ko‘ra, marhum Davlatobod tumanidagi 56-sonli umumta’lim maktabining 5-sinf o‘quvchisi bo‘lgan.
