Afg‘onistonda oilalar tirik qolish uchun qizlarini sotishga majbur bo‘lmoqda — BBC
BMT ma’lumotlariga ko‘ra, bu yil Afg‘onistonga ajratilgan gumanitar yordam hajmi o‘tgan yilga nisbatan qariyb 70 foizga kamaygan.
BBC xabariga ko‘ra, Afg‘onistonning markaziy G‘or viloyatida kuchayib borayotgan gumanitar inqiroz ayrim oilalarni tirik qolish uchun qiz farzandlarini sotishga majbur qilmoqda.
Xabarda aytilishicha, uzoq davom etayotgan qurg‘oqchilik, ishsizlik darajasining yuqoriligi va xalqaro yordamning keskin kamayishi sabab mamlakatning ko‘plab hududlarida og‘ir iqtisodiy vaziyat yuzaga kelgan. BMT ma’lumotlariga ko‘ra, Afg‘oniston aholisining qariyb 75 foizi asosiy ehtiyojlardan mahrum bo‘lib, millionlab odamlar ochlik xavfi ostida yashamoqda.
G‘or viloyatining markazi Chag‘charon shahrida yuzlab erkaklar har kuni vaqtinchalik ish topish umidida to‘planishadi. Biroq ish o‘rinlari juda kamligi sabab ko‘pchilik oilalar kunlik oziq-ovqatni ham ta’minlay olmayapti.
Mahalliy aholi vakillarining BBC’ga bildirishicha, ayrim oilalar bolalarini boqish, qarzlarini yopish yoki kasal farzandlarini davolatish uchun qizlarini boshqa oilalarga berishga majbur bo‘lmoqda. Fuqarolardan biri bolalariga non topib bera olmayotganini aytsa, yana biri farzandining operatsiyasi uchun mablag‘ topish maqsadida qizini qarindoshiga berganini bildirgan.
Shuningdek, reportajda Tolibon tomonidan ayollar ta’limi va mehnat faoliyatiga qo‘yilgan cheklovlar ham vaziyatni yanada og‘irlashtirgani qayd etilgan.
BMT ma’lumotlariga ko‘ra, bu yil Afg‘onistonga ajratilgan gumanitar yordam hajmi o‘tgan yilga nisbatan qariyb 70 foizga kamaygan. AQSH va boshqa yirik donor davlatlar moliyaviy ko‘makni sezilarli darajada qisqartirgan.
Mamlakatdagi tibbiyot muassasalari ham og‘ir ahvolda qolmoqda. Shifokorlar dori-darmon va oziq-ovqat yetishmasligi sabab yangi tug‘ilgan chaqaloqlar orasida o‘lim ko‘rsatkichlari oshayotganini bildirgan.
