“Bunyodkor” xodimlarining 867 mln so‘m ish haqi to‘liq undirildi
Stadionda faoliyat yuritayotgan 49 nafar ishchi oylik maoshlarini ololmayotganini ma'lum qilgan edi.
“Bunyodkor” stadioni xodimlarining bir necha oydan buyon to‘lanmay kelgan ish haqi qarzdorligi to‘liq undirib berildi. Bu haqda Davlat mehnat inspeksiyasi matbuot xizmati ma’lum qildi.
Ma’lum qilinishicha, inspeksiyaning yozma ko‘rsatmasiga asosan stadionda faoliyat yuritayotgan 49 nafar texnik xodim — jumladan qorovul, santexnik, farrosh va elektrchilarning jami 867 million so‘m miqdoridagi ish haqi qarzdorligi to‘liq qoplab berilishi ta’minlangan.
Avvalroq mazkur xodimlar bir necha oydan buyon oylik maoshlarini ololmayotgani, bu esa ularning moddiy ahvoliga jiddiy ta’sir ko‘rsatayotgani yuzasidan ommaviy axborot vositalariga murojaat qilgan. Murojaatlarda ayrim xodimlar kredit majburiyatlarini bajarishda qiyinchilikka uchragani va kundalik ehtiyojlarini ta’minlashda muammolar yuzaga kelgani ham qayd etilgan.
Stadion ma’muriyati tomonidan oyliklarning kechikishi moliyaviy manbalardagi o‘zgarishlar bilan izohlangan bo‘lsa-da, Davlat mehnat inspeksiyasi aralashuvidan so‘ng holat to‘liq bartaraf etilgan.
Hozirda “Bunyodkor” stadioni xodimlari oldida ish haqi bo‘yicha qarzdorlik mavjud emas.
