Qirg‘iziston–O‘zbekiston chegarasidagi uchta punkt 24 soatlik ish rejimiga o‘tdi
Ushbu tartib 2026-yil 1-oktabrgacha amal qilishi belgilangan.
Qirg‘iziston va O‘zbekiston chegarasidagi uchta nazorat-o‘tkazish punkti 24 soatlik ish rejimiga o‘tkazildi. Bu haqda Qirg‘iziston Davlat chegara xizmati ma’lumotiga tayanib “AKIpress” xabar berdi.
Ma’lum qilinishicha, Botken viloyatida joylashgan “Qadamjoy — avtoyo‘l”, “Chashma — avtoyo‘l” hamda “Oq-Qiya — avtoyo‘l” punktlari 20-maydan boshlab tun-u kun uzluksiz faoliyat yuritmoqda.
Mazkur qaror sayyohlik mavsumi davomida chegaradan o‘tuvchi fuqarolar uchun qulay shart-sharoitlar yaratish maqsadida qabul qilingan. Yangi tartibga ko‘ra, ushbu punktlardan faqat Qirg‘iziston va O‘zbekiston fuqarolari o‘tish imkoniga ega bo‘ladi.
Shuningdek, 24 soatlik ish rejimi 2026-yil 1-oktabrgacha amal qilishi belgilangan.
