Toshkent viloyatida 20 ming dollarlik noqonuniy yer savdosi to‘xtatildi
Mahalla raisi, kadastr muhandisi va yana bir fuqaro 10 sotix yerni sotmoqchi bo'lgan.
Toshkent viloyatining Parkent tumanida davlat zaxirasidagi yer maydonini noqonuniy sotishga uringan shaxslar qo‘lga olindi. Bu haqda DXX Zamon.uz'ga xabar berdi.
Ma’lum qilinishicha, tumandagi mahalla fuqarolar yig‘inlaridan birining raisi hamda 1970-yilda tug‘ilgan fuqaro davlat zaxirasida bo‘lgan 10 sotix yer maydonini xaridorga 20 ming AQSH dollariga sotishga kelishgan.
Ular yer hujjatlarini rasmiylashtirib berish uchun Davlat kadastrlari palatasining tuman filiali muhandisiga 2–3 ming dollar berishni rejalashtirgan.
Davlat xavfsizlik xizmati xodimlari tomonidan Iqtisodiy jinoyatlarga qarshi kurashish departamenti hamda ichki ishlar organlari bilan hamkorlikda o‘tkazilgan tezkor tadbir davomida mahalla raisi, kadastr muhandisi va 1970-yilda tug‘ilgan fuqaro 17 ming AQSH dollari hamda 37 million so‘m olayotgan vaqtida ushlangan.
Holat yuzasidan mazkur shaxslarga nisbatan jinoyat ishi qo‘zg‘atilib, tergov harakatlari olib borilmoqda.
