Toshkentda milliy terma jamoa JCHga kuzatilishi sabab ayrim ko‘chalar vaqtincha yopiladi
Cheklovlar tadbir xavfsizligi va uni yuqori saviyada tashkil etish maqsadida joriy etilmoqda.
O‘zbekiston milliy terma jamoasini jahon chempionatiga kuzatish tadbiri munosabati bilan Toshkent shahrining ayrim ko‘chalarida transport vositalari harakati vaqtincha cheklanishi mumkin. Bu haqda Toshkent shahrida Yo‘l harakatini tashkil etish markazi matbuot xizmati xabar berdi.
Ma’lum qilinishicha, tadbirni xavfsiz va yuqori saviyada tashkil etish maqsadida 22-may kuni soat 16:00 dan 21:00 gacha poytaxtning ayrim yo‘nalishlarida transport harakati vaqti-vaqti bilan cheklanadi.
Cheklovlar quyidagi yo‘nalishlarda amal qilishi mumkin:
- Chilonzor–Cho‘ponota ko‘chalari chorrahasidan Cho‘ponota ko‘chasi bo‘ylab Qatortol–Cho‘ponota ko‘chalari chorrahasigacha;
- KXAY–Chilonzor ko‘chalari chorrahasidan Chilonzor ko‘chasi bo‘ylab Chilonzor–Cho‘ponota ko‘chalari chorrahasigacha;
- KXAY–Bunyodkor ko‘chalari chorrahasidan Bunyodkor ikkinchi darajali yo‘li bo‘ylab Bunyodkor–Cho‘ponota ko‘chalari chorrahasigacha;
- Nurafshon–Sebzor ko‘chalari chorrahasidan Sebzor ko‘chasi bo‘ylab Islom Karimov–Bunyodkor ko‘chalari chorrahasigacha;
- Islom Karimov–Bunyodkor ko‘chalari chorrahasidan Bunyodkor ko‘chasi bo‘ylab Bunyodkor–Ikkinchi Qatortol ko‘chalari chorrahasigacha.
Haydovchilardan oldindan muqobil yo‘nalishlarni rejalashtirish so‘raldi.
