Bekobodda “gashish” savdosi va “bangixona” tashkil qilgan shaxslar 8-10 yilga qamaldi
Muqaddam sudlangan ayol qo‘shni davlatdan narkotik modda olib kirishga uringan vaqtida sheriklari bilan birga ushlangan.
Toshkent viloyatining Bekobod tumanida giyohvand moddalar savdosi bilan shug‘ullangan hamda “bangixona” tashkil etgan jinoiy guruh faoliyatiga chek qo‘yildi. Sud hukmiga ko‘ra, mazkur shaxslarga 8 yil 3 oydan 10 yil 6 oygacha ozodlikdan mahrum qilish jazosi tayinlandi. Bu haqda DXX Zamon.uz' ga xabar berdi.
Ma’lum qilinishicha, 1999-yilda tug‘ilgan, avval Jinoyat kodeksining 112 va 140-moddalari bilan sudlangan ayol 2025-yil iyul oyida qo‘shni respublikaga borib, narkosavdogardan 1 kilogramm “gashish” moddasini 6 ming AQSH dollariga sotib olish hamda uni O‘zbekiston hududiga olib kirish bo‘yicha kelishuvga erishgan.
Shundan so‘ng u “Whatsapp” messenjeri orqali giyohvandlik vositasi yashirib qoldirilgan manzilni olgan va avval ham giyohvand moddalar bilan bog‘liq jinoyatlar uchun sudlangan ikki tanishi bilan Bekobod shahri hududidagi dala maydoniga borgan.
Ular yashirin joydan narkotik moddani olayotgan vaqtida Davlat xavfsizlik xizmati va bojxona organlari xodimlari tomonidan tezkor tadbir davomida ashyoviy dalillar bilan qo‘lga olingan.
Ekspertiza xulosasiga ko‘ra, musodara qilingan giyohvandlik vositasining sof og‘irligi 985 grammni tashkil etgan.
Tergov davomida aniqlanishicha, ayol o‘zining 1993-yilda tug‘ilgan sherigi bilan Bekobod shahrida ijaraga olingan xonadonda giyohvand moddalarni sotish va iste’mol qilish uchun “bangixona” tashkil qilgan.
Jinoyat ishlari bo‘yicha Bekobod shahar sudining hukmiga ko‘ra, ushbu shaxslar Jinoyat kodeksining 246 va 273-moddalarida nazarda tutilgan jinoyatlarni sodir etganlikda aybli deb topildi hamda qamoq jazosi tayinlandi.
