O‘zbekistonda ilk bor robot yordamida masofaviy jarrohlik amaliyoti o‘tkazildi
Operatsiyani Respublika ixtisoslashtirilgan jarrohlik ilmiy-amaliy tibbiyot markazi mutaxassisi Xitoydan turib o'tkazdi.
O‘zbekistonda ilk bor robot yordamida masofaviy jarrohlik amaliyoti muvaffaqiyatli amalga oshirildi. Bu haqda Sog‘liqni saqlash vazirligi matbuot xizmati ma’lum qildi.
Qayd etilishicha, yuqori texnologiyali operatsiya Respublika ixtisoslashtirilgan jarrohlik ilmiy-amaliy tibbiyot markazi mutaxassisi Abdurashid Abdukarimov tomonidan Xitoydan turib bajarilgan.
Mutaxassislarning ta’kidlashicha, robot-jarrohlik tizimi shifokorga eng murakkab va nozik harakatlarni yuqori aniqlikda bajarish imkonini beradi. Ushbu texnologiya bemorga kamroq jarohat yetkazish, operatsiyadan keyingi tiklanish jarayonini tezlashtirish hamda tibbiy xizmat sifatini oshirishda muhim ahamiyat kasb etadi.
Shuningdek, masofaviy robot operatsiyasi zamonaviy tibbiyotda geografik masofalar endilikda to‘siq emasligini yana bir bor namoyon etdi. Endi bir davlatda bo‘lgan mutaxassis boshqa mamlakatdagi bemorda murakkab jarrohlik amaliyotini masofadan turib bajarishi mumkin.
