Andijonda ta’lim muassasasi direktori 10 ming dollar pora bilan qo‘lga tushdi
Shuningdek, noqonuniy yer savdosi holati bilan bog‘liq bir nechta mansabdor shaxslar qo‘lga olindi.
Andijon viloyatida noqonuniy yer savdosi va korrupsion holatlar bilan bog‘liq bir nechta mansabdor shaxslar qo‘lga olindi. Bu haqda DXX Zamon.uzga xabar berdi.
Ma’lum qilinishicha, Farg‘ona vodiysi magistral kanallardan foydalanish boshqarmasining 2-Shahrixon bo‘limi 3-gidrouchastkasi boshlig‘i chorvachilik faoliyatini yo‘lga qo‘ymoqchi bo‘lgan fuqaroga Katta Farg‘ona kanali himoya hududidagi 30 sotix yer maydonini ijara asosida rasmiylashtirib berish evaziga 40,5 ming AQSh dollari talab qilgan.
U Davlat xavfsizlik xizmati Andijon viloyati boshqarmasi hamda Bosh prokuratura huzuridagi Departament xodimlari tomonidan oldindan 20 ming dollar olgan vaqtida ashyoviy dalillar bilan ushlangan.
Tezkor tadbir davomida ushbu noqonuniy holatga Farg‘ona vodiysi magistral kanallardan foydalanish boshqarmasi bo‘lim boshlig‘i ham aloqador ekani aniqlanib, u 20 ming dollardan 3 ming dollar olgan vaqtida qo‘lga tushdi.
Shuningdek, mazkur yer maydonidan ijara asosida foydalanib kelayotgan 3-gidrouchastka xodimi ham yer ajratib berish evaziga 19 ming AQSh dollari talab qilgani aniqlanib, holat tegishli tartibda rasmiylashtirilgan.
Bundan tashqari, Oltinko‘l tumanidagi ta’lim muassasasi direktori ham xizmat mavqeidan foydalanib, muassasa hududidagi 1,1 gektar yer maydoni bo‘yicha kelishuv shartnomasini tasdiqlab berish evaziga 15 ming AQSh dollari talab qilgan. U oldindan 10 ming dollar olgan vaqtida huquqni muhofaza qiluvchi organlar tomonidan ushlangan.
Hozirda har ikki holat yuzasidan jinoyat ishlari qo‘zg‘atilib, tergov harakatlari olib borilmoqda.
