AQSH Isroilni Eron bo‘yicha muzokaralardan chetlashtirdi — NYT
Nashrga ko‘ra, bu holat saylovlar oldida turgan Netanyaxuga siyosiy zarba berishi mumkin.
AQSH ma’muriyati Isroilni Eron bilan olib borilayotgan muzokaralardan amalda chetlashtirgan. Bu haqda The New York Times Tel-Avivdagi amaldorlarga tayanib xabar berdi, deya yozmoqda RIA Novosti.
NYT ma’lumotlariga ko‘ra, Isroil rasmiylari Vashington va Tehron o‘rtasidagi muzokaralar haqida yetarli ma’lumot olmayapti. Shu sababli ular muzokaralarga oid tafsilotlarni mintaqadagi diplomatlar, siyosiy aloqalar hamda Eron ichidagi kuzatuvlar orqali yig‘ishga majbur bo‘lmoqda.
Amerikalik amaldorlarning aytishicha, AQSH prezidenti Donald Tramp Isroil bosh vaziri Benyamin Netanyaxuni harbiy ittifoqchi sifatida ko‘rsa-da, Eron bilan muzokaralarda yaqin siyosiy hamkor deb hisoblamaydi. NYT’ning yozishicha, Isroilning roli “teng huquqli sherik” maqomidan ikkinchi darajali ishtirokchi darajasiga tushib qolgan.
Gazeta bu holat Netanyaxu uchun siyosiy jihatdan og‘ir zarba bo‘lishi mumkinligini qayd etgan. Chunki u joriy yilda murakkab qayta saylov kampaniyasiga tayyorgarlik ko‘rmoqda.
Shu bilan birga, AQSH Davlat departamenti iyun boshida Isroil va Livan o‘rtasida muzokaralar o‘tkazilishini ma’lum qilgan. O‘t ochishni to‘xtatish rejimi saqlanayotganiga qaramay, Isroil armiyasi Livan hududiga zarbalar berishda davom etmoqda. “Hizbulloh” harakati esa bunga javoban chegara hududidagi isroillik harbiylarga hujum qilmoqda.
The Wall Street Journal’ning yozishicha, Donald Tramp Eronga qarshi yangi harbiy zarbalarni hozircha kechiktirib, diplomatik muzokaralarni davom ettirishni ma’qul ko‘rgan. Fars agentligi esa Vashington mojaro yakunlanishi uchun Tehronga beshta shart qo‘yganini bildirgan. Qayd etilishicha, ushbu talablar Eron tomonining pozitsiyasiga zid hisoblanadi.
