O‘zbekiston merganlari Turkiyadagi musobaqada birinchi o‘rinni egalladi
Mudofaa vazirligi jamoasi “Eng ilg‘or merganlar” musobaqasida ketma-ket uchinchi marta oltin medalni qo‘lga kiritdi.
O‘zbekiston Respublikasi Mudofaa vazirligi harbiy xizmatchilaridan iborat merganlar jamoasi Turkiyada bo‘lib o‘tgan VI Xalqaro “Eng ilg‘or merganlar jamoasi” musobaqasida faxrli 1-o‘rinni qo‘lga kiritdi. Bu haqda Mudofaa Vazirligi matbuot xizmati xabar berdi.
Musobaqa joriy yilning 10–21-may kunlari Isparta Kommandos Tog‘-o‘quv markazida tashkil etildi. Unda 13 davlatdan 24 ta jamoa ishtirok etgan.
Ishtirokchilar “Minora va qayiqdan o‘q otish”, “Jangovar otish”, “Yuqori aniqlikda otish”, “To‘siq ortidan otish”, “Havodagi vertolyotdan otish”, “O‘zini sinash”, “Tunda noma’lum masofalarga o‘q otish” hamda “Syurpriz” kabi murakkab shartlar bo‘yicha o‘z mahoratini namoyish etgan.
Qariyb 10 kun davom etgan bellashuvlar yakuniga ko‘ra, O‘zbekiston Respublikasi Mudofaa vazirligi harbiy xizmatchilaridan iborat jamoa xorijiy davlatlar armiyalari orasida faxrli 1-o‘rinni egallab, oltin medal bilan taqdirlangan.
Ta’kidlash joizki, Mudofaa vazirligi jamoasi ushbu musobaqada beshinchi marotaba ishtirok etmoqda. 2022–2023-yillarda 2-o‘rinni, 2024–2026-yillarda esa ketma-ket 1-o‘rinni qo‘lga kiritib kelmoqda.
