Rossiyada migrantlar farzandlari uchun rus tilini bepul o‘qitish taklif qilindi
Tashabbus mualliflariga ko‘ra, bu bolalarning integratsiyasiga yordam beradi va rus tilining xorijdagi mavqeini saqlashga xizmat qiladi.
Rossiyaning Sverdlovsk viloyati Inson huquqlari bo‘yicha vakili Tatyana Merzlyakova migrantlar farzandlari uchun rus tilini bepul o‘qitish tashabbusi bilan chiqdi. Uning ta’kidlashicha, hozirgi vaqtda bunday kurslar asosan ota-onalar mablag‘i hisobidan tashkil etilmoqda. Bu haqda Kommersant nashri xabar berdi.
Merzlyakovaning fikricha, mazkur tashabbus nafaqat migrant oilalarni qo‘llab-quvvatlash, balki rus tilining xalqaro mavqeini saqlab qolish va kengaytirish uchun ham muhim ahamiyatga ega.
“Men bolalarga rus tilini bepul o‘qitish tarafdoriman”, — dedi u mahalliy telekanallardan biriga bergan intervyusida.
Ombudsman Rossiyaning o‘zi ayrim hollarda rus tilining xorijda keng tarqalish imkoniyatlarini cheklab qo‘yayotganini qayd etgan. Unga ko‘ra, bugungi sharoitda tilning mavqeini zaiflashtirish emas, aksincha, mustahkamlash muhim vazifa hisoblanadi.
Shuningdek, u sobiq Sovet mamlakatlarida ham yoshlar orasida ingliz tilida ta’lim olishga qiziqish ortib borayotganini ta’kidlagan. Merzlyakovaga ko‘ra, bu holat rus tilining ta’sir doirasiga ham o‘z ta’sirini ko‘rsatmoqda.
Mazkur tashabbus Rossiya jamoatchiligida turli munozaralarga sabab bo‘ldi. Uni qo‘llab-quvvatlovchilar bu migrant bolalarning jamiyatga integratsiyasini yengillashtirishini aytmoqda. Tanqidchilar esa bepul ta’lim dasturi davlat budjetiga qo‘shimcha yuk bo‘lishini ta’kidlamoqda.
