Rubio AQSh, Ukraina va Rossiya o‘rtasidagi muzokaralar to‘xtaganini ma'lum qildi
AQSh Davlat kotibi Vashington samarasiz muzokaralarda qatnashishdan manfaatdor emasligini bildirdi.
AQSh Davlat kotibi Marko Rubio Shvetsiyada bo‘lib o‘tgan NATO tashqi ishlar vazirlari uchrashuvi davomida AQSh, Ukraina va Rossiya o‘rtasidagi uch tomonlama muzokaralar hozircha amalda mavjud emasligini ma’lum qildi.
Uning ta’kidlashicha, avval Rossiya va Ukraina faqat AQSh vositachiligida muzokara olib borishga tayyor bo‘lgan. Shu sababli Vashington jarayonga jalb qilingan, biroq muzokaralar kutilgan natijani bermagan.
Rubio AQSh zarur holatda vositachilikni davom ettirishga tayyorligini bildirar ekan, samarasiz muzokaralarda ishtirok etishdan manfaatdor emasligini ham qayd etgan.
Shuningdek, AQSh Davlat kotibi Vashington Ukrainani qo‘llab-quvvatlash siyosatini davom ettirishini ta’kidlagan.
Bayonotda AQShning Yevropadagi harbiy ishtiroki masalasiga ham to‘xtalib o‘tilgan. Rubio Qo‘shma Shtatlar o‘zining global harbiy joylashuvini qayta ko‘rib chiqayotganini va Yevropadagi Amerika harbiy kuchlari soni bosqichma-bosqich kamaytirilishi mumkinligini aytgan.
Uning so‘zlariga ko‘ra, bu qaror siyosiy emas, balki strategik va texnik omillar bilan bog‘liq. Shu bilan birga, NATO tasarrufidagi ayrim AQSh qo‘shinlari soni ham qisqartirilishi mumkin.
Rubio Eron bilan bog‘liq vaziyat yuzasidan ham fikr bildirib, AQSh Pokiston vositachiligidagi muzokaralarda ayrim ijobiy siljishlarga erishganini, biroq yakuniy maqsadlarga hali erishilmaganini qayd etgan.
