Tramp Eron mojarosi sabab o‘g‘lining to‘yida qatnashmaydi

 

AQSh prezidenti Donald Tramp Eron bilan bog‘liq vaziyat yuzasidan keyingi qadamlarni muhokama qilish maqsadida Oq uyda milliy xavfsizlik bo‘yicha yuqori martabali rasmiylar bilan uchrashuv o‘tkazdi.

 

CNN ma’lumotiga ko‘ra, yig‘ilishda vitse-prezident J. D. Vens, mudofaa vaziri Pit Hegset hamda boshqa xavfsizlik mas’ullari ishtirok etgan.

 

Ma’lum qilinishicha, uchrashuv Eron bilan mojaroni diplomatik yo‘l bilan hal etish bo‘yicha davom etayotgan muzokaralar fonida bo‘lib o‘tgan. Biroq yig‘ilish yakunida aniq qaror qabul qilinmagan.

 

CNN manbalariga ko‘ra, muzokaralar sur’atidan norozi bo‘lgan Trampga harbiy harakatlarni qayta boshlash bo‘yicha bir nechta variantlar taqdim etilgan. AQSh rahbari avvalroq Fors ko‘rfazi davlatlari iltimosi bilan ehtimoliy zarbalarni vaqtincha ortga surgani haqida aytgan edi.

 

Shuningdek, Tramp Nyu-Jersida rejalashtirilgan dam olish safari va o‘g‘lining Bagama orollaridagi to‘yida ishtirok etishni bekor qilgan. U bu qarorini “hukumat ishlari va Amerika manfaatlari” bilan izohlagan.

 

“Menimcha, aynan shu muhim paytda Vashingtonda, Oq uyda qolishim zarur”, — deb yozgan u Truth Social tarmog‘ida.

 

Ayni paytda AQShning Eron bo‘yicha keyingi qadamlari qanday bo‘lishi hozircha noma’lumligicha qolmoqda. Manbalarga ko‘ra, Vashington diplomatik yo‘l bilan kelishuvga erishish imkoniyatini ham saqlab qolmoqda.