AQSh–Eron muzokaralarining yangi bosqichi 5-iyun kuni o‘tkazilishi rejalashtirilmoqda
Dastlabki kelishuv “Islomobod deklaratsiyasi” nomi bilan e’lon qilinishi mumkin.
Al-Hadath telekanali xabariga ko‘ra, AQSh va Eron o‘rtasidagi navbatdagi muzokaralar joriy yilning 5-iyun kuni bo‘lib o‘tishi kutilmoqda. Mazkur ma’lumot telekanal tomonidan muzokaralar jarayonidan xabardor manbalarga tayanib e’lon qilingan.
Qayd etilishicha, Vashington va Tehron o‘rtasida dastlab o‘zaro anglashuv memorandumini imzolash masalasi muhokama qilinmoqda. Manbalarga ko‘ra, ushbu hujjat tomonlar o‘rtasidagi yakuniy kelishuvga erishish yo‘lidagi muhim bosqich sifatida baholanmoqda.
Shuningdek, memorandum imzolangach, tomonlar mojaro va qarama-qarshi masalalarni to‘liq hal etishga qaratilgan batafsil muzokaralarga o‘tishi rejalashtirilgani aytilmoqda. Dastlabki hujjat “Islomobod deklaratsiyasi” nomi bilan e’lon qilinishi mumkinligi ham ma’lum qilingan.
Manbalarning ta’kidlashicha, muzokaralarda vositachi sifatida faol qatnashayotgan Pokiston memorandumni asosiy tomonlar ishtirokisiz ham e’lon qilishi ehtimoldan xoli emas.
Shuningdek, AQSh va Eron yakuniy kelishuv bo‘yicha to‘liq muzokaralar boshlanishi bilan o‘z delegatsiyalarining yuqori darajadagi rahbarlarini jarayonga jalb qilishi kutilmoqda.
