Buxoroda tuman sog‘liqni saqlash bo‘limi rahbari pora bilan qo‘lga tushdi
U tibbiy xaridlar bo‘yicha tuzilgan shartnoma mablag‘larni o‘tkazib berish evaziga 150 million so‘m miqdorida “ulush” talab qilgan.
Buxoro viloyatida tuman sog‘liqni saqlash bo‘limi rahbari pora olish bilan bog‘liq jinoyat ustida qo‘lga olindi. Bu haqda DXX Zamon.uzga ma’lum qildi.
Qayd etilishicha, joriy yilda tuman sog‘liqni saqlash bo‘limi hamda dori-darmon va tibbiy buyumlar yetkazib beruvchi MChJ o‘rtasida 1 milliard 2 million so‘mlik shartnoma tuzilgan. Dastlab mablag‘larning 30 foizi MChJ hisob raqamiga o‘tkazilgan.
Shundan so‘ng, tuman sog‘liqni saqlash bo‘limi rahbari qolgan mablag‘larni o‘tkazib berish va kelgusidagi xaridlarni ham mazkur MChJ orqali amalga oshirish evaziga shartnoma qiymatining 15 foizi — 150 million so‘m miqdorida “ulush” talab qilganligi aniqlangan.
DXX xodimlari tomonidan o‘tkazilgan tezkor tadbir davomida mansabdor shaxs talab qilingan pul mablag‘idan 11 800 AQSh dollarini o‘z turmush o‘rtog‘i orqali olayotgan vaqtida ushlangan.
Shuningdek, u tuman miqyosidagi oilaviy poliklinikalar uchun ajratilgan 448 million so‘mlik rag‘batlantirish mablag‘larining yarmini qaytarish sharti bilan qayta yig‘ib olganligi ham aniqlangan.
Mazkur holat yuzasidan sog‘liqni saqlash bo‘limi boshlig‘iga nisbatan Jinoyat kodeksining 210-moddasi (pora olish) hamda 167-moddasi (o‘zlashtirish yoki rastrata yo‘li bilan talon-toroj qilish) bilan, MChJ vakiliga esa 211-moddasi (pora berish) bilan jinoyat ishi qo‘zg‘atilib, tergov harakatlari davom ettirilmoqda.
